ޔޫރަޕުގެ ފުޓްބޯޅަ ލީގުތަކުގައި އެންމެ ގިނަ ގޯލު ޖެހުމުގެ އެންމެ މަތީ ޝަރަފު، ރެއާލް މެޑްރިޑްގެ ހުނަރުވެރި ފޯވަޑް ކީލިއަން އެމްބާޕޭ އަށް ލިބިއްޖެއެވެ. މި ފަހަރު އޭނާއަށް ދެ ރަން ބޫޓުގެ މަތިވެރި މަޤާމު ހާސިލުކުރެވުނެވެ.
ފްރާންސްގެ ޕެރިސް ސެއިންޓް-ޖަރމަން (ޕީއެސްޖީ) އާ ވަކިވެ، މި މޫސުމުގެ ކުރިން ހިލޭ ބަދަލުވުމެއްގައި ރެއާލް މެޑްރިޑާ ގުޅުނު އެމްބާޕޭ ވަނީ ނިމިދިޔަ މޫސުމުގައި ޖުމުލަ 31 ގޯލު ޖަހާފައެވެ. އަދ. އަދި މުޅި މޫސުމަށް ބަލާއިރު، އޭނާ ރެއާލް އަށް ޖަހައިދިން ގޯލުގެ އަދަދު 42 އަށް އަރާފައިވެއެވެ. ޔޫރަޕުގެ ފުޓްބޯޅައިގައި ޖަހާ ގޯލާއި ގޯލު ޖަހަން އެހީތެރިވެދިނުމުގެ ޕޮއިންޓް ސިސްޓަމުން އޭނާއަށް 62 ޕޮއިންޓް ލިބިފައިވެއެވެ.
އެމްބާޕޭއަށް ވުރެ ގިނަ ގޯލު ޖެހި ކުޅުންތެރިޔާއަކީ ޕޯޗުގަލްގެ ސްޕޯޓިންގ ލިސްބަންގެ ފޯވަޑް ވިކްޓަރ ގިޔޮކްރެސްއެވެ. އޭނާ 39 ގޯލު ޖެހި ނަމަވެސް، ޕޮއިންޓް ސިސްޓަމުން މާކްސް ދިނުމުން ލިބުނީ 58.5 ޕޮއިންޓެވެ.
އިނގިރޭސި ޕްރިމިއަރ ލީގުގެ ރަން ބޫޓު ހޯދި ލިވަޕޫލްގެ މިސުރުގެ ތަރި މުހައްމަދު ސަލާހަށް ލިބުނީ 56 ޕޮއިންޓެވެ.
އެމްބާޕޭ މި މޫސުމުގައި ރެއާލް އަށް ޖަހައިދިން ގޯލުގެ އަދަދު 42 އަށް އެރި ނަމަވެސް، މޫސުމުގެ ފުރަތަމަ ބައިގައި އޭނާގެ ފެންވަރު އެހާ މަތިވެރިއެއް ނޫނެވެ. އެހެންނަމަވެސް، ފަހުން އޭނާގެ ކުޅުމުގެ ފެންވަރު މަތިވެ، ރެއާލް މެޑްރިޑުގެ އެންމެ އުޖާލާ ކުޅުންތެރިޔާގެ ގޮތުގައި ފާހަގަކުރެވުނެވެ.
