މިނިސްޓްރީ އޮފް ޓޫރިޒަމް އެންޑް އެންވަޔަރަމަންޓުން ދުނިޔޭގެ ތިމާވެށީގެ ދުވަސް ފާހަގަކުރުމުގެ ގޮތުން ރާއްޖޭގެ ސްކޫލްތަކުން ގަސް އިންދުމުގެ ޕްރޮގްރާމްތަކެއް ކުރިއަށް ގެންދިއުމަށް މަޝްވަރާކޮށްފިއެވެ.

ފަސް މިލިއަން ގަސް މަޝްރޫޢުގެ އޮފިޝަލުންނާއި މިނިސްޓްރީ އޮފް އެޑިއުކޭޝަންގެ އިސްވެރިންނާ ދެމެދު ބޭއްވުނު ބައްދަލުވުމެއްގައި ދަރިވަރުންގެ މެދުގައި ތިމާވެށި ރައްކާތެރިކުރުމުގެ ހޭލުންތެރިކަން އިތުރުކުރުމަށާއި، ގަސްގަހާގެހި އިންދުމުގެ މުހިންމުކަން އުނގަންނައިދިނުމަށް މި ޕްރޮގްރާމްތައް ރޭވިފައިވާކަމަށް ބައްދަލުވުމުގައި ބައިވެރިވި ފަރާތްތަކުން ހާމަކުރި އެވެ.

މި ޕްރޮގްރާމްތައް ކުރިއަށް ގެންދިއުމަށް ހަމަޖެހިފައިވަނީ މި އަހަރުގެ ޖޫން މަހުގެ 5 ވަނަ ދުވަހު ފާހަގަކުރާ ދުނިޔޭގެ ތިމާވެށީގެ ދުވަހާ ދިމާކޮށެވެ. މި ޕްރޮގްރާމްތަކުގައި ރާއްޖޭގެ ހުރިހާ ސަރަހައްދެއްގެ ސްކޫލްތަކުން ބައިވެރިވާނެ އެވެ.

މި ޕްރޮގްރާމްތަކުގެ ސަބަބުން ކުޑަ އިރުއްސުރެ ދަރިވަރުންނަށް ތިމާވެށި ރައްކާތެރިކުރުމުގެ މުހިންމުކަން އެނގި، އެކަމަށް އަހުލުވެރިވެގެންދާނެ ކަމަށާއި އަދި މުސްތަޤުބަލުގައި ތިމާވެށި ހިމާޔަތްކުރުމަށް މަސައްކަތްކުރާނެ ޖީލެއް އުފެދިގެންދާނެ ކަމަށް ޓޫރިޒަމް އެންޑް އެންވަޔަރަމެންޓް މިނިސްޓްރީން ބުނެ އެވެ.