ސުޕްރީމް ކޯޓުގެ ފަނޑިޔާރުކަމުން ޑރ. އަޒްމިރަލްދާ ޒާހިރު އާއި މަހާޒު އަލީ ޒާހިރު ފަނޑިޔާރުކަމުން ވަކިކުރަން ރައްޔިތުންގެ މަޖިލީހުގެ ޖުޑީޝަރީ ކޮމިޓީން ނިންމައިފިއެވެ.
ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރާއި މަހާޒް އަލީ ޒާހިރު މަގާމުން ވަކިކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ރައްޔިތުންގެ މަޖިލީހަށް ހުށަހެޅުމުން، އެ މައްސަލަ ދިރާސާކުރުމުގެ މަސައްކަތް ކުރީ ޖުޑީޝަރީ ކޮމިޓީންނެވެ.
މިއަދު ބޭއްވި އެ ކޮމިޓީގެ ބައްދަލުވުން ހޫނުވެ އިދިކޮޅު އެމްޑީޕީން ވަނީ ކޮމިޓީ ބޮއިކޮޓްކޮށްފައެވެ. އެ ކޮމިޓީގައި ހިމެނިވަޑައިގަންނަވާ އެމްޑީޕީގެ ދެ މެންބަރުންނަކީ ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލާއި ކެންދޫ ދާއިރާގެ މެންބަރު މައުރޫފް ޒާކިރެވެ.
އިއްޔެ ވެސް އެ ކޮމިޓީގެ ބައްދަލުވުމެއް ބޭއްވިއެވެ. އެ ބައްދަލުވުމުގައި ކެންދޫ ދާއިރާގެ މެންބަރު މައުރޫފް ޒާކިރު ވަނީ ކޮމިޓީއަށް ހާޒިރުކުރުމަށް ހުށަހަޅުއްވައިފައެވެ. ނަމަވެސް އެ ހުށަހެޅުން ފާސްކުރުމަށް ވޯޓު ދެއްވީ ހަމައެކަނި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލްއެވެ. އެހެންކަމުން އެ ހުށަހެޅުން ފާސްވެފައެއް ނުވެއެވެ.
އެ ހުށަހެޅުމުގެ ކުރިން ހުޅުދޫ ދާއިރާގެ މެންބަރު މުހައްމަދު ޝާހިދު ވަނީ އިޖުރާއީ ކަމެއް ފާހަގަނުކުރެވޭތީ، ޖޭއެސްސީގެ ނިންމުމާ އެއްގޮތަށް މައްސަލަ މަޖިލީހުގެ ތަޅުމަށް މައްސަލަ ފޮނުވުމަށް ހުށަހަޅުއްވައިފައެވެ. ނަމަވެސް އެ ހުށަހެޅުއްވުމަށް އިއްޔެގެ ބައްދަލުވުމުގައި ވޯޓަށް އަހައިފައެއް ނުވެއެވެ.
އެ ދެ ބޭފުޅުން ވަކިކުރަން ފާސްކުރީ މިއަދު ބޭއްވި ސިއްރު ބައްދަލުވުމުގައެވެ.
ޖޭއެސްސީން ބުނެފައިވަނީ، މި އަޒްމިރަލްދާ އާއި މަހާޒް ފަނޑިޔާރުކަމުން ވަކިކުރަން ނިންމާފައިވަނީ މިދިޔަ ޑިސެމްބަރު 4 ވަނަ ދުވަހު ކްރިމިނަލް ކޯޓަށް ހާޒިރުކުރެވުނު މައްސަލައަކާ ގުޅިގެން ކްރިމިނަލް ކޯޓުގެ ގާޒީންނަށް ނުފޫޒު ފޯރުވާފައިވާކަން ސާބިތުވެފައިވާތީ ކަމަށެވެ.
މި ދެ ފަނޑިޔާރުންގެ އަމަލަކީ ގާނޫނުއަސާސީގެ 142 ވަނަ މާއްދާއާއި، ދިވެހިރާއްޖޭގެ ފަނޑިޔާރުންގެ ގާނޫނުގެ ބައެއް މާއްދާތަކާއި، ފަނޑިޔާރުންގެ ސުލޫކީ މިންގަނޑާ ހިލާފު އަމަލެއް ކަމަށް ޖޭއެސްސީން ބުނެފައިވެއެވެ.
