ފުލުހުންގެ ހައުސިން ޕްރޮޖެކްޓްގެ ތެެރެއިން ސިފައިންގެ ވެލްފެއާ ކުންފުނި، ޕޮލިސް ކޯޕަރޭޓިވް ސޮސައިޓީ (ޕޮލްކޯ)އިން ހިންގާފައިވާ ހިޔާނާތުގެ މައްސަލަ ބަލަމުންދާ ރައްޔިތުންގެ މަޖިލީހުގެ މާލިއްޔަތު ކޮމިޓީގެ ސަބް ކޮމިޓީގެ މިއަދުގެ ބައްދަލުވުން ވެސް ސިއްރުކޮށްފިއެވެ.
ސަބް ކޮމިޓީގެ މިއަދުގެ ބައްދަލުވުމުގައި އޮތީ، އެ މައްސަލައިގެ ތަހުގީގު ރިޕޯޓް ކޮމިޓީން ނިންމުމުގެ ކުރިން، އެ މައްސަލައާ ބެހޭގޮތުން ޕޮލްކޯގެ ކުރީގެ ހިންގާ ކޮމިޓީގެ މެންބަރުންނާ ބައްދަލުކުރުމެވެ.
މިއަދުގެ ކޮމިޓީ ބައްދަލުވުން ފައްޓަވަމުން އެ ކޮމިޓީގެ މުގައްރިރު ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދައިރާގެ މެންބަރު އަހުމަދު ނާޒިމް ވިދާޅުވީ، ޕޮލްކޯ މައްސަލައާ ބެހޭގޮތުން މިއަދު ބާއްވާ ބައްދަލުުވުމުގައި ވެސް އެންޓި ކޮރަޕްޝަން ކޮމިޝަން (އޭސީސީ)ގެ ބޭފުޅުން އޮބްޒާވަރުންގެ ގޮތުގައި ބައިވެރިވާ ކަމަށެވެ.
ކުރީ ދުވަހުގެ ކޮމިޓީ ބައްދަލުވުމުގައިވެސް، އެ ކޮމިޝަނުން އެދިގެން އެ ބައްދަލުވުން ސިއްރުކުރިގޮތަށް މިއަދުގެ ބައްދަލުވުންވެސް ކުރިއަށްގެންދާނީ ސިއްރު ބައްދަލުވުމެއްގެ ގޮތުގައި ކަމަށް ނާޒިމް ވިދާޅުވިއެވެ.
