އިނގިރޭސި ޕްރިމިއަރ ލީގުގައި ރޭ ބޭއްވުނު މުބާރާތެއްގައި އެސްޓަން ވިލާ އިން ފުލަމް އާ ދެކޮޅަށް ކުޅެ، 1-0 ގެ ނަތީޖާއަކުން ކާމިޔާބު ހޯދައި، ޔޫރަޕުގެ އެންމެ މަތީ ފަންތީގެ މުބާރާތް ކަމުގައިވާ ޗެމްޕިއަންސް ލީގުގައި ބައިވެރިވުމުގެ ފުރުސަތު އިތިތުރަށް ފުޅާކޮށްފިއެވެ.
މި ކާމިޔާބީއާ އެކު، އެސްޓަން ވިލާ އަށް ވަނީ މިހާތަނަށް ކުޅުނު 35 މެޗުން 60 ޕޮއިންޓް ހޯދައި، ލީގު ތާވަލުގެ 7 ވަނަ ހިސާބަށް އަރާފައެވެ. ޗެލްސީ އާއި ނޮޓިންހަމް ފޮރެސްޓް ވެސް ވަނީ 60 ޕޮއިންޓް ހޯދައި، ތާވަލުގެ 5 ވަނަ އަދި 6 ވަނަ ހިސާބުގައެވެ. މި މެޗުން ބަލިވި ފުލަމް އަށް ލިބިފައިވާ 51 ޕޮއިންޓާއެކު، އެ ޓީމު ވަނީ ތާވަލުގެ 9 ވަނައިގައެވެ.
ޕްރިމިއަރ ލީގުގެ އެންމެ މަތީ ފަސް ޓީމަށް ޔޫއެފާ ޗެމްޕިއަންސް ލީގުގައި ބައިވެރިވުމުގެ ފުރުސަތު ލިބިގެންދާއިރު، ލިވަޕޫލް އިން ޗެމްޕިއަންކަން ހޯދާފައިވާތީ، އަނެއް ހަތަރު ޖާގައަށް ވާދަކުރުން ވަނީ އިތުރަށް ހޫނުވެފައެވެ.
އެސްޓަން ވިލާގެ ވިލާ ޕާކުގައި 42,000 އަށްވުރެ ގިނަ ކުޅިވަރު ލޯބިވެރިންގެ ހާޒިރުގައި ކުޅުނު މި މެޗުގައި، ހަމައެކަނި ލަނޑު ޖެހީ ޖެހީ މެޗުގެ 12 ވަނަ މިނެޓުގައި އެސްޓަން ވިލާގެ ޔޫރީ ޓިއެލެމަންސް އެވެ.
މެޗުގެ ދެވަނަ ބައިގައި އެސްޓަން ވިލާގެ އޮލީ ވޮޓްކިންސް އަށް ލަނޑު ޖެހުމުގެ ރަނގަޅު ފުރުސަތެއް ލިބުނު ނަމަވެސް، ފުލަމްގެ ގޯލްކީޕަރު މެޓީ ކޭޝްގެ ހުނަރުވެރި ސޭވަކުން އެ ފުރުސަތު ގެއްލުނެވެ.
ދެ ޓީމުގެ ފަރާތުން ވެސް ވާދަވެރި ކުޅުމެއް ދައްކާފައިވާ މި މެޗުގައި އެސްޓަން ވިލާއަށް ވަނީ ލީޑު އިތުރުކުރުމަށް ގިނަ ފުރުސަތުތަކެއް ލިބިފައެވެ. މީގެ ތެރޭގައި އޮލީ ވޮޓްކިންސް އާއި ޓިއެލެމަންސްއަށް ލިބުނު ފުރުސަތުތައް ފާހަގަކޮށްލެވެއެވެ.
ދެވަނަ ބައިގައި ފުލަމްގެ ސެސެގްނަން އެސްޓަން ވިލާގެ ގޯލަށް ލަނޑެއް ޖެހި ނަމަވެސް، ވީޑިއޯ އެސިސްޓަންޓް ރެފްރީ (ވީއޭއާރު) ގެ އެހީގައި ރެފްރީ ވަނީ އެ ލަނޑު ބާޠިލުކޮށްފައެވެ. މިއީ ލަނޑު ޖެހުމުގެ ކުރިން ފުލަމްގެ ކުޅުންތެރިއެއްގެ އަތުގައި ބޯޅަ ޖެހިފައިވާތީއެވެ.
މި މެޗުން ބަލިވުމާއެކު، ފުލަމް ވަނީ އެންމެ ފަހުން ކުޅުނު 10 މެޗުގެ ތެރެއިން 6 މެޗުން ބަލިވެފައެވެ.
