ރާއްޖޭގައި މަސްތުވާތަކެތި ބޭނުން ކުރާ މީހުން އެ ވަބާއިން ސަލާމަތް ކުރަން ބޭނުންވާ ފަރުވާ އިންޑިއާގެ ފެސިލިޓީއަކުން ހޯދުމުގެ މަގުފަހިވެފައިވާ ކަމަށް ނެޝަނަލް ޑްރަގް އެޖެންސީ (އެންޑީއޭ) އިން ބުނެފިއެވެ.
އެންޑީއޭ އިން ބުނީ ރާއްޖޭގެ އެޑިކްޓުންނަށް ބޭނުންވާ ފަރުވާ ދޭނީ އިންޑިއާގެ ކަލިސެރީގައި ހުންނަ ޑރ. ކޭއެމް ޗެރިއަމް އިންސްޓިޓިއުޓް އޮފް މެޑިސަލް ސައިންސެސްގައިގައި ކަމަށެވެ. އެތަނުން ދިވެހި އެޑިކްޓުންނަށް ފަރުވާ ހޯދުމާ ގުޅޭ ގޮތުން މަޝްވަރާކޮށްފައި ވަނީ އެންޑީއޭގެ އެކްޓިން ސީއީއޯ މުހައްމަދު ރަޝާދު އިސްކޮށް ހުންނަވައިގެން އެތަނުގެ ވެރިންނާ އެކު ބޭއްވި ބައްދަލުވުމެއްގައެވެ.
ފަރުވާ ހޯދުމާ ގުޅޭ އެއްބަސްވުމަކަށް މިހާރު ވަނީ އާދެވިފައެވެ.
އެންޑީއޭ އިން ބުނީ ކޭއެމް ޗެރިއަމް އިންސްޓިޓިއުޓް އޮފް މެޑިސަލް ސައިންސެސްއާ އެކު ކުރެވުނު މަޝްވަރާގައި ދެ ފަރާތް ގުޅިގެން ކުރިއަށް އޮތް ތަނުގައި މަސައްކަތް ކުރުމަށާއި ރާއްޖޭގައި ފަރުވާގެ ކަންކަން އިތުރަށް ހަރުދަނާ ކުރުމާއި މަސްތުވާތަކެތީގެ މައްސަލަ ހައްލު ކުރަން ދެ ފަރާތް ގުޅިގެން އިތުރަށް ކުރެވިދާނެ ކަންކަމާ ގުޅޭ ގޮތުން މަޝްވަރާކޮށްފައިވާނެ ކަމަށެވެ.
ރާއްޖެއަށް ކުރިމަތިވެފައިވާ މަސްތުވާތަކެތީގެ ވަބާއިން ދިވެހި ޒުވާނުން ސަލާމަތް ކުރުމަށް ސަރުކާރުން އަންނަނީ މުހިންމު މަސައްކަތްތަކެއް ކުރަމުންނެވެ.
