މާލޭގެ ބޮޑުތަކުރުފާނު މަގުގެ އުތުރު ސަރަޙައްދު ހަތަރު ލޭނަށް ފުޅާކޮށް، ޒަމާނީ ފެންވަރަށް ތަރައްޤީ ކުރުމުގެ މަޝްރޫޢު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށްފިއެވެ. މި މަޝްރޫޢުގެ ދަށުން ހުޅުމާލޭ ފެރީ ޓާމިނަލުން ފެށިގެން ލޯކަލް މާރުކޭޓާ ހަމައަށް 830 މީޓަރުގެ ސަރަޙައްދެއް ތަރައްޤީ ކުރެވޭނެއެވެ.
މި މަޝްރޫޢުގެ އަގަކީ 144.5 މިލިއަން ރުފިޔާ ކަމަށްވާއިރު، 455 ދުވަހުގެ ތެރޭގައި މަސައްކަތް ނިންމުމަށް ވަނީ ހަމަޖެހިފައެވެ. މަޝްރޫޢުގެ ދަށުން މަގު ފުޅާކުރުމުގެ އިތުރުން، ކީވޯލް ބޭރަށް ޖެއްސުމާއި، ދުވާރު ހެދުމާއި، ފެން ހިންދާ ނިޒާމް ޤާއިމްކުރުމާއި، ރޯޑް މާކިންގ އަދި ސައިން ބޯޑު ހަރުކުރުން ފަދަ މަސައްކަތްތައް ހިމެނެއެވެ.
މި މަޝްރޫޢަކީ މާލޭގެ ނޯތު ހާބަރާ ހަމައަށް ކުރިއަށްގެންދެވޭ މަސައްކަތެއްގެ ފުރަތަމަ ފިޔަވަހި ކަމަށް އިމާރާތްކުރުމާއި ގެދޮރުވެރިކަމާއި ބިނާވެށީގެ ވަޒީރު ޑރ. ޢަބްދުﷲ މުއްޠަލިބު ވިދާޅުވެފައިވެއެވެ. އަދި މި މަސައްކަތް ކުރިއަށް ގެންދާނީ ކަމާ ގުޅުންހުރި ފަރާތްތަކާއެކު ރޭވިގެން، އެ ސަރަޙައްދުގެ ޓްރެފިކަށް ފަސޭހަވާނެ ގޮތަށް ކަމަށްވެސް ވަޒީރު ފާހަގަކުރައްވާފައިވެއެވެ.
އެމްޓީސީސީގެ މެނޭޖިންގ ޑިރެކްޓަރ ޑީ.ސީ.ޕީ (ރިޓަޔަރޑް) އަޙްމަދު ސަޢުދީ ވަނީ މި މަސައްކަތް ކަނޑައެޅިފައިވާ މުއްދަތަށްވުރެ ކުރިން ނިންމުމަށް މަސައްކަތްކުރައްވާނެ ކަމަށް ވިދާޅުވެފައެވެ. އަދި މި މަސައްކަތް ކުރިއަށްދާއިރު ރައްޔިތުންގެ އެއްބާރުލުން ބޭނުންވާނެ ކަމަށްވެސް އެމަނިކުފާނު ފާހަގަކުރައްވާފައިވެއެވެ.
މި މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ ފެބްރުއަރީ މަހު އިޢުލާންކުރެއްވި މަޝްރޫޢެކެވެ. މި މަޝްރޫޢުގެ އިތުރުން، މާލެ އަދި ވިލިމާލޭގެ އެހެނިހެން މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތް ޗައިނާ ސަރުކާރުގެ ހިލޭ އެހީގެ ދަށުން ކުރިއަށްދާނެ ކަމަށް ވަނީ ހާމަކުރެވިފައެވެ.
