ރާއްޖޭގެ 18 ރަށެއްގައި ޖުމްލަ 38 މެގަވޮޓް އަވަރގެ ބެޓެރީ އެނަރޖީ ސްޓޯރޭޖް ސިސްޓަމް ޤާއިމްކުރުމުގެ މަޝްރޫޢު ފެށިއްޖެއެވެ. މި މަޝްރޫޢަކީ ފަތުރުވެރިކަމާއި ތިމާވެއްޓާ ބެހޭ ވުޒާރާއިން ކުރިއަށްގެންދާ “އެކްސަލަރޭޓިންގ ސަސްޓެއިނަބަލް ސިސްޓަމް ޑިވެލޮޕްމަންޓް ޔޫސިން ރިނިއުބަލް އެނަރޖީ” ޕްރޮޖެކްޓްގެ ދަށުން ހިންގޭ މުހިންމު މަސައްކަތެކެވެ.
މި މަޝްރޫޢުގެ ދަށުން، 500 ކިލޯވޮޓް އަވަރުން ފެށިގެން 3000 ކިލޯވޮޓް އަވަރާ ހަމައަށް ހުރި ބެޓެރީ ސިސްޓަމްތައް އެކި ރަށްރަށުގައި ޤާއިމްކުރެވޭނެއެވެ. މި މަސައްކަތް ޙަވާލުކޮށްފައިވަނީ ޗައިނާގެ ކުންފުނިތަކެއްގެ ޖޮއިންޓް ވެންޗަރއަކާއެވެ.
މި މަޝްރޫޢުގެ މައިގަނޑު މަޤްޞަދަކީ އިއާދަކުރަނިވި ހަކަތައިން އުފައްދާ ކަރަންޓުގެ މިންވަރު އިތުރުކުރުމެވެ. މީގެ ސަބަބުން، 2028 ވަނަ އަހަރުގެ ނިޔަލަށް ރާއްޖެއަށް ބޭނުންވާ ކަރަންޓުގެ 33 އިންސައްތަ އިއާދަކުރަނިވި ހަކަތައިން އުފެއްދުމުގެ ލަނޑުދަނޑި ޙާޞިލްކުރުމަށް މަގުފަހިވެގެންދާނެއެވެ.
މި ސިސްޓަމްތައް ޤާއިމްކުރުމުގެ ސަބަބުން، އިތުރު ސޯލާ ޕީވީ ސިސްޓަމްތައް ގާއިމުކުރުމަށާއި، ގްރިޑް ސްޓެބިލައިޒް ކުރުމަށް ފުރުޞަތު ލިބި، އަދި މަގޭ ސޯލަރ ޕްރޮގްރާމްގެ ދަށުން ގޭގޭގައާއި އިމާރާތްތަކުގައި ސޯލަރ ޕީވީ ހަރުކުރުމަށްވެސް މަގުފަހިވެގެންދާނެއެވެ.
ބެޓެރީ އެނަރޖީ ސްޓޯރޭޖް ސިސްޓަމް ޤާއިމްކުރާ ރަށްތައް:
1- ހދ. ހަނިމާދޫ: 2000 ކިލޯވޮޓް އަވަރ
2- ށ. މިލަންދޫ: 2500 ކިލޯވޮޓް އަވަރ
3- ނ. ހޮޅުދޫ: 1500 ކިލޯވޮޓް އަވަރ
4- ނ. މަނަދޫ: 3000 ކިލޯވޮޓް އަވަރ
5- ނ. ވެލިދޫ: 3000 ކިލޯވޮޓް އަވަރ
6- ރ. އަލިފުށި: 2000 ކިލޯވޮޓް އަވަރ
7- ރ. ހުޅުދުއްފާރު: 1500 ކިލޯވޮޓް އަވަރ
8- ބ. ދަރަވަންދޫ: 2500 ކިލޯވޮޓް އަވަރ
9- ބ. ތުޅާދޫ: 3000 ކިލޯވޮޓް އަވަރ
10- މ. މުލައް: 2000 ކިލޯވޮޓް އަވަރ
11- މ. މުލީ: 2000 ކިލޯވޮޓް އަވަރ
12- މ. ވޭވައް: 500 ކިލޯވޮޓް އަވަރ
13- މ. ރަތްމަންދޫ: 500 ކިލޯވޮޓް އަވަރ
14- ތ. ގުރައިދޫ: 2500 ކިލޯވޮޓް އަވަރ
15- ރ. ތިމަރަފުށި: 3000 ކިލޯވޮޓް އަވަރ
16- ގއ. މާމެންދޫ: 1000 ކިލޯވޮޓް އަވަރ
17- ގދ. ފަރެސްމާތޮޑާ: 3000 ކިލޯވޮޓް އަވަރ
18- ގދ. ގައްދޫ: 2500 ކިލޯވޮޓް އަވަރ
މީގެ އިތުރުން، މި މަޝްރޫޢުގެ ސަބަބުން އަހަރަކު ގާތްގަނޑަކަށް 8.4 މިލިއަން ލީޓަރުގެ ޑީސަލް ސަލާމަތްކުރެވި، އަހަރަކު ގާތްގަނޑަކަށް 125 މިލިއަން ރުފިޔާގެ ތެލުގެ ޚަރަދު ކުޑަކުރެވޭނެކަމަށް ލަފާކުރެވެއެވެ. މިއީ ދިވެހިރާއްޖޭގެ ތިމާވެށި ރައްކާތެރިކުރުމަށާއި، އިޤްތިޞާދީ ގޮތުން ފައިދާހުރި، ދެމެހެއްޓެނިވި ތަރައްޤީއަށް އެޅޭ މުހިންމު ފިޔަވަޅެކެވެ.
ކިޔުންތެރިންގެ ހިޔާލު