މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އާއި ދުނިޔޭގެ ނަން މަޝްހޫރު އެއަރ އެންޑް ޓްރެވަލް ސާވިސް ފޯރުކޮށްދޭ ކުންފުންޏެއް ކަމުގައިވާ ޓްރެވަލްބޭގް (ޑިނާޓީއޭ ޔޫކޭ) އާ ގުޅިގެން އިނގިރޭސިވިލާތުގައި މުޝްތަރަކު މާކެޓިން ކެމްޕޭނެއް ފަށައިފިއެވެ.

މި ދެމަސްދުވަހުގެ ސްޓްރެޓެޖިކް އެއްބާރުލުމުގެ މައިގަނޑު މަޤްޞަދަކީ، އިނގިރޭސިވިލާތުގެ ފަތުރުވެރިންގެ މެދުގައި ޗުއްޓީ ހޭދަކުރުމަށް އެންމެ މަޤްބޫލު މަންޒިލެއްގެ ގޮތުގައި ދިވެހިރާއްޖެ ކުރިއެރުވުމެވެ. 1979 ވަނަ އަހަރުން ފެށިގެން މި ދާއިރާގައި ހަރަކާތްތެރިވަމުން އަންނަ ޓްރެވަލްބޭގްގެ އަމާޒަކީ ގިނަ ރަށްތަކުގެ ޗުއްޓީތަކާއި ފަހުގެ ފެންވަރުގެ ރިސޯޓުތަކުގައި ޚިދުމަތް ލިބިގަންނަ ފަރާތްތަކުގެ ބޭނުންތަކަށް އަމާޒުކޮށްގެން ފަޚުރުވެރި ދަތުރުފަތުރުގެ ތަޖުރިބާއެއް ފޯރުކޮށްދިނުމެވެ.

ދިވެހިރާއްޖެ ފަދަ އިނގިރޭސިވިލާތުގައި މަޤްބޫލު، މަތީ ފެންވަރުގެ ފަތުރުވެރި މަންޒިލުތަކަށް ޚާއްޞަކޮށްގެން މި ކުންފުނިން ޔޫކޭގައި 8 ފިހާރަ ހިންގަމުން ގެންދެއެވެ. ޓްރެވަލްބޭގުން 95 އިންސައްތަ ބުކިންގތައް ހޯދަނީ އޮފްލައިންކޮށް މި ފިހާރަތަކުންނާއި ކޯލް ސެންޓަރުތައް މެދުވެރިކޮށެވެ. މި ކުންފުންޏާ ގުޅިގެން ހިންގާ ކެމްޕޭންގެ މައިގަނޑު އަމާޒަކީ އިނގިރޭސިވިލާތުގެ ފަތުރުވެރިންގެ މެދުގައި އެންމެ މަޤްބޫލު މަންޒިލަކަށް ކަށް ދިވެހިރާއްޖެ ހެދުމެވެ.

ޓްރެވަލްބޭގްގައި ޤާއިމުކޮށްފައިވާ ޚިދުމަތް ލިބިގަންނަ ފަރާތްތަކުގެ މަޢުލޫމާތު ބޭނުންކޮށްގެން ޚަރަދު ކުޑަ، އަމާޒުހިފި މާކެޓިންގ ކުރިއަށް ގެންދެވޭނެއެވެ. ސީދާ ވިއްކުމާއި ޑިޖިޓަލް މަންސަތަކަށް އަމާޒުކޮށްގެން، މި ކެމްޕޭނުން ފޯރުންތެރިކަމާއި ބައިވެރިވުން އެންމެ ފުރިހަމައަށް ލިބި، ގިނަ ގުޅުންހުރި ނުކުތާތަކެއްގައި އެކަށޭނަ ޚިދުމަތް ލިބިގަންނަ ފަރާތްތަކާ ގުޅުން ބަދަހިކުރެވޭނެއެވެ. މީގެ އިތުރުން، އިނގިރޭސިވިލާތުގެ މާކެޓަށް އެމްއެމްޕީއާރުސީ އިން ކަނޑައަޅާފައިވާ ސްޓްރެޓެޖީތަކާ އެއްގޮތަށް މި ޙަރަކާތުގައި އިސްކަންދެނީ ވަކިވަކި އުފެއްދުންތަކާއި ރާއްޖޭގެ ތަފާތު ތަޖުރިބާތައް އިޝްތިހާރުކޮށް ކުުރިއެރުވުމަށެވެ. މިގޮތުން ރާއްޖޭގެ މަތީ ފެންވަރުގެ ރިސޯޓްތަކާއި ލިވަބޯޑްތައް އަދި ރާއްޖޭގައި ޢާއިލާއާއެކު ޗުއްޓީ ހޭދަކުރުމަށް ހުރި ފުރުޞަތުތަކާއި ރާއްޖޭގެ ސާފު ރީތި ތިމާވެށްޓާ ގުޅޭ ތަފާތު ތަޖުރިބާތަކާއި ތިމާވެށި ޙިމާޔަތްކުރުމަށް ކުރެވޭ މަސައްކަތްތަކަށް އަލިއަޅުވާލެވޭނެއެވެ.

އެއް މިލިއަން ހަތް ލައްކައަށްވުރެ ގިނަ ފަރާތްތަކަށް ފޯރާނެކަމަށް ލަފާކުރެވޭ މި ކެމްޕޭންގެ އަމާޒަކީ، ކެމްޕޭންގެ މުއްދަތުގައި އާމްދަނީގެ ގޮތުގައި ކޮންމެ ބުކިންގއަކުން 10,680 ޕައުންޑް ހޯދުމެވެ.

ދިވެހިރާއްޖޭގެ ފަތުރުވެރިކަމުގެ މުހިންމު ބައިވެރިއެއްގެ ގޮތުގައި ފާހަގަކުރެވޭ އިނގިރޭސިވިލާތަކީ، ރާއްޖެއަށް ތިންވަނައަށް އެންމެ ގިނަ ފަތުރުވެރިން ޒިޔާރަތްކުރާ ޤައުމެވެ. މި އަހަރުގެ މިހާތަނަށް އިނގިރޭސިވިލާތުން ދެ ލައްކައަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ.

މި އިސސްތިރާޖީ ގުޅުމަކީ ދިވެހިރާއްޖޭގެ ފަތުރުވެރިކަން އިތުރަށް ކުރިއެރުވުމަށް އެޅޭ މުހިންމު ފިޔަވަޅެކެވެ. އެމްއެމްޕީއާރުސީ އާއި ޓްރެވަލްބޭގްގެ މި މުޝްތަރަކު މަސައްކަތުން، އިނގިރޭސިވިލާތުގެ ފަތުރުވެރިންގެ މެދުގައި ދިވެހިރާއްޖޭގެ ޖާޒިބިއްޔަތު އިތުރުވެ، ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވެގެންދާނެކަމަށް އުންމީދުކުރެވެއެވެ. މި ކެމްޕޭނަކީ ދިވެހިރާއްޖޭގެ ފަތުރުވެރިކަމުގެ ޞިނާޢަތަށް އައު ހިތްވަރަކާއި ކުރިއެރުމެއް ގެނެސްދޭނެ މުހިންމު މަސައްކަތެއް ކަމުގައި ބެލެވެއެވެ.