އޭޝިއަން ކަޕް ކޮލިފިކޭޝަންގައި ރާއްޖެއިން ކުޅުނު ފުރަތަމަ މެޗުގައި ފިލިޕީންސް އަތުން ބަލިވެއްޖެއެވެ.
ފިލިޕީންސްގެ ނިއު ކްލާކް ސިޓީ އެތުލެޓިކްސް ސްޓޭޑިއަމްގައި މިއަދު ކުޅުނު ކޮލިފިކޭޝަންގެ ތިންވަނަ ބުރުގެ ގްރޫޕް ސްޓޭޖު މެޗުގައި ފިލިޕީންސް އަތުން ރާއްޖެ ބަލިވީ 4-1 ގެ ނަތީޖާއަކުންނެވެ.
މެޗު ފެށިގެން މާގިނައިރުތަކެއް ނުވަނީސް ފިލިޕީންސް އިން ވަނީ ނުރައްކާކުރަން ފަށައިފައެވެ. ނަތީޖާއެއްގެ ގޮތުން މެޗުގެ ހަވަނަ މިނެޓުގައި ފިލިޕީންސް އިން ލީޑު ނެގިއެވެ. އެ ޓީމަށް އެ ގޯލު ޖަހައިދިނީ ޖެފަސަން ތަބީނާސްއެވެ.
މެޗުގެ 18 ވަނަ މިނެޓުގައި ފިލިޕީންސް އިން ދެވަނަ ގޯލެއް ޖަހައި ލީޑު ފުޅާކުރިއެވެ. ރާއްޖޭގެ ޑިފެންސުން ހެދި ގޯހަކުން، އެ ގޯލު ޖަހައިދިނީ ފިލިޕީންސްގެ ބޯޖާން މާޓިން ކްރިސްޓެންސެންއެވެ. މެޗުގެ ފުރަތަމަ ހާފު ނިމިގެންދިޔައީ 2-0 ގެ ނަތީޖާއަކުން ފިލިޕީންސް ކުރީގައި އޮވެގެންނެވެ.
ދެވަނަ ހާފުގައި ރާއްޖެއިން މަސައްކަތްތަކެއްކޮށް، މެޗުގެ 65 ވަނަ މިނެޓުގައި ގޯލެއް ޖެހިއެވެ. ހުސައިން ސިފާއު (ކްރޯ) ނަގައިދިން ހުރަހަކުން ރާއްޖެއަށް އެ ގޯލު ކާމިޔާބުކޮށްދިނީ އަލީ ފާސިރު (ސެންޓޭ) އެވެ.
މެޗު ނިމުމުގެ ކުރިން ފިލިޕީންސް އިން ވަނީ އިތުރު ދެ ގޯލު ޖަހައިފައެވެ. ފިލިޕީންސަށް އެ ގޯލުތައް ކާމިޔާބުކޮށްދިނީ ރޭންޑީ ޝެނައިޑާ އާއި ސާންޑްރޯ ރެޔެސްއެވެ.
ފުޓުބޯޅައިގެ ހާލަތު ގޯސްވެފައިވާ ރާއްޖޭގެ އިތުރުން އެ ގްރޫޕުގައި ދެން ހިމެނެނީ ފިލިޕީންސް އާއި ތަޖިކިސްތާން އަދި ޓިމޯ ލެސްޓޭއެވެ.
