ކީރިތި ޤުރުއާން ހިތުދަސްކޮށް ޙާފިޒުންނަށް ވާ ފަރާތްތަކަށް ދޫކުރާ ސަނަދު މޯލްޑިވްސް ކޮލިފިކޭޝަންސް އޮތޯރިޓީ (އެމްކިޔުއޭ) އިން ޤަބޫލުކުރާ މިންގަނޑަށް ބަދަލުކުރުމަށް ނިންމައިފިއެވެ. މިއީ މިދިޔަ އަހަރު އިސްލާމީ ކަންތައްތަކާބެހޭ ވުޒާރާއާއި އެމްކިޔުއޭއާ ދެމެދު ކުރެވުނު މަޝްވަރާތަކަށްފަހު ގެނެވުނު ބަދަލެކެވެ.
މި ބަދަލާއެކު، ޙާފިޒުކަމުގެ ސަނަދު ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑުގެ ލެވެލް 4 ނުވަތަ އެޑްވާންސްޑް ސެޓްފިކެޓްގެ ފެންވަރުގައި ބަލައިގަނެވޭނެއެވެ. މި ސަނަދު ހޯދުމަށް ދެ މަގެއް ވަނީ ކަނޑައަޅާފައެވެ.
އެގޮތުން، ފުރަތަމަ މަގަކީ ލޯވަރ ސެކަންޑަރީ ސެޓްފިކެޓް ހާސިލުކުރުމާއެކު، މޯލްޑިވްސް ނޭޝަނަލް ކޮލިފިކޭޝަންސް ފްރޭމްވޯކްގެ ލެވެލް 3ގެ ސަނަދެއް ހާސިލުކުރުމެވެ. ދެވަނަ މަގަކީ 18 އަހަރު ފުރިހަމަވެ، އެއް އަހަރު ދުވަހުގެ މަސައްކަތުގެ ތަޖުރިބާ ލިބިފައިވުމާއެކު، ލެވެލް 3ގެ ސަނަދެއް ހާސިލުކުރުމެވެ.
ރައީސް ޑރ. މުޙައްމަދު މުޢިއްޒުގެ ސަރުކާރުން ވަނީ ޙާފިޒުންނަށް ސަނަދު ދޫކުރުމުގެ އުސޫލަށް އިތުރު ލުއިތަކެއް ގެނެސްފައެވެ. މީގެ ތެރޭގައި ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް) އިން ޤުރުއާން ހިތުދަސްކުރާ ދަރިވަރުންނަށް، ކުރިން ޤުރުއާނާބެހޭ މަރުކަޒުގެ އިމްތިޙާނު ހަދަންޖެހުނު ނަމަވެސް، މިހާރު ސީދާ ސަނަދު ދެވޭގޮތަށް ހަމަޖެހިފައިވުން ފާހަގަކުރެވެއެވެ.
ޙާފިޒުންނަށް ސަނަދު ދޫކުރުމުގެ މަސައްކަތް ކުރިއަށްގެންދަނީ އިސްލާމީ ކަންތައްތަކާބެހޭ ވުޒާރާގެ ދަށުން ހިންގާ ކީރިތި ޤުރުއާނާބެހޭ ޤައުމީ މަރުކަޒުންނެވެ. މި މަރުކަޒުގައި ރަޖިސްޓަރީކޮށްގެން ހިންގާ ޤުރްއާން ހިތުދަސްކުރުމުގެ ކުލާސްތަކުން ދަރިވަރުން އިމްތިޙާނުކޮށް، ފާސްވާ ފަރާތްތަކަށް ސަނަދު ދޫކުރެއެވެ.
