އެންވައިރަމަންޓް އެންޑް ޓޫރިޒަމް މިނިސްޓަރު އަލްފާޟިލް ތޯރިގް އިބްރާހީމް ވަނީ ޔުނައިޓެޑް ނޭޝަންސްގެ ޓޫރިޒަމް މިނިސްޓަރުންގެ ސަމިޓުގައި ބައިވެރިވެވަޑައިގެންފައެވެ.

ބާލިންގައި ބޭއްވުނު މި މުހިންމު ބައްދަލުވުމުގައި، ރާއްޖޭގެ އިންވެސްޓްމަންޓް ފުރުސަތުތައް ފުޅާކުރުމާއި، ބައިނަލްއަޤްވާމީ ސުލްހަ މަސަލަސްކަން ދެމެހެއްޓުމާއި، ދުނިޔޭގެ ފަތުރުވެރިކަމުގެ ދާއިރާއަށް ދިމާވެފައިވާ ގޮންޖެހުންތަކަށް ހައްލު ހޯދުމާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނެވެ. މީގެ އިތުރުން، ރާއްޖޭގެ ފަތުރުވެރިކަމުގެ ދާއިރާގައި އަމާންކަން ޤާއިމުކުރުމާއި ގްލޯބަލް ޓޫރިޒަމް ރެސިލިއަންސް ހަރުދަނާކުރުމާ ގުޅޭ މަޝްވަރާތަކެއްވެސް މިނިސްޓަރު ކުރެއްވިއެވެ.

ދުނިޔޭގެ އެކި ޤައުމުތަކުގެ ޓޫރިޒަމް މިނިސްޓަރުންނާއި އިސްވެރިން ބައިވެރިވެވަޑައިގެންނެވި މި ސަމިޓަކީ ފަތުރުވެރިކަމުގެ ސިނާޢަތު ކުރިއެރުވުމަށް އެޅޭ މުހިންމު ފިޔަވަޅެއްކަމުގައި ޓޫރިޒަމް މިނިސްޓްރީން ފާހަގަކުރެއްވިއެވެ.

މި ދަތުރުފުޅުގައި މިނިސްޓަރު ތޯރިގް ވަނީ އައިޓީބީ ބާލިން 2025 ގައި ދުބައި ނެޝަނަލް އެއާ ޓްރެވަލް އޭޖެންސީ (ޑީއެންއޭޓީއޭ) އާ ބައްދަލުކުރައްވައި، ރާއްޖޭގެ ފަތުރުވެރިކަމުގެ ޕާޓްނަރޝިޕްތައް ހަރުދަނާކުރުމާއި، ވައިގެ ދަތުރުފަތުރުގެ ޚިދުމަތްތައް ތަރައްޤީކުރުމާ ގުޅޭގޮތުން މަޝްވަރާކުރައްވާފައެވެ.