އދ. ދިގުރަށުން މާލެއަށް ދަތުރުކުރަމުންދިޔަ “ހުވަން” ނަމަކަށް ކިޔާ ލޯންޗެއް ކަނޑުއަޑިއަށް ގޮސް، އޭގައި ތިބި 45 ފަސިންޖަރުންނާއި 3 ފަޅުވެރިން ސަލާމަތްކުރެވިއްޖެއެވެ. މި ހާދިސާ ހިނގާފައިވަނީ މިއަދު ހެނދުނު 07:57 ހާއިރުގައި ކަމަށް ދިވެހި ފުލުހުންގެ ޚިދުމަތުން މަޢުލޫމާތު ދެއްވާފައިވެއެވެ.

ފުލުހުންގެ އިމަރޖެންސީ ރެސް ރެސްޕޮންސް ޓީމުތަކުން ވަގުތުން ހާދިސާ ހިނގި ސަރަޙައްދަށް ގޮސް، ކަނޑަށް ވެއްޓުނު އެންމެހައި ފަރާތްތައް ސަލާމަތްކޮށްފައިވެއެވެ. ސަލާމަތްކުރެވުނު މީހުންގެ ތެރޭގައި 4 ކުޑަކުދިންވެސް ހިމެނެއެވެ. އަދި ސަލާމަތްކުރެވުނު އެންމެންގެ ޞިއްޙީ ޙާލަތު ރަނގަޅު ކަމަށާއި، މިހާރު އެފަރާތްތައް ވަނީ އދ. ދިގުރަށަށް އަނބުރާ ގެންދެވިފައި ކަމަށް ފުލުހުން ވިދާޅުވެފައިވެއެވެ.

މި ހާދިސާއާ ގުޅިގެން ދިވެހި ފުލުހުންގެ ޚިދުމަތުން ތަޙްޤީޤެއް ފަށާފައިވާ ކަމަށް އެ ޚިދުމަތުން ހާމަކުރައްވާފައިވެއެވެ.

މިދުވަސްވަރަކީ ރާއްޖެއަށް ވިއްސާރަވެ، މޫސުން ގޯސްވެފައިވާ ދުވަސްވަރަކަށް ވުމާއެކު، ކަނޑު ދަތުރުފަތުރު ކުރާ ފަރާތްތަކުން ސަމާލުކަން ބެހެއްޓުމަށް މޫސުމާބެހޭ ޤައުމީ މަރުކަޒާއި ކަމާގުޅުންހުރި އެހެނިހެން އިދާރާތަކުން އިލްތިމާސްކުރައްވައެވެ. އަދި ކަނޑުދަތުރު ކުރާއިރު އުޅަނދުފަހަރުގެ ސަލާމަތީ ފިޔަވަޅުތައް ފުރިހަމަވެފައިވޭތޯ ކަށަވަރުކުރުމަށް އާންމުންނަށް އިރުޝާދު ދެއްވާފައިވެއެވެ.