ސްޓެލްކޯއިން މިއަދު ފަށައިފައިވާ ޚާއްސަ ޙަރަކާތެއްގެ ދަށުން، ރޯދަމަހުގެ ކުރިން ކަރަންޓު ބިލުގެ ރީޑިން ނަގައި ނިންމުމަށް މަސައްކަތް ފަށައިފިއެވެ. މި ޙަރަކާތް ފައްޓަވައިދެއްވީ ސްޓެލްކޯގެ މެނޭޖިންގ ޑިރެކްޓަރ ހުސެއިން ފަހުމީ އެވެ.

މި އަހަރުގެ ރަމަޟާން މަހުގެ ކަރަންޓާއި ފެންބިލުން ޑިސްކައުންޓް ދިނުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ނިންމެވުމާ ގުޅިގެން، މި ޚާއްސަ ޙަރަކާތް ވަނީ ފަށާފައެވެ. ގްރޭޓަރ މާލެ ސަރަޙައްދުގައި ރީޑިން ނެގުމުގެ މަސައްކަތުގައި ސްޓެލްކޯގެ އެކި މަޤާމުތައް އަދާކުރާ 350 އަށްވުރެ ގިނަ މުވައްޒަފުން ބައިވެރިވާނެއެވެ.

މިއަދު ބޭއްވުނު ނޫސްވެރިންގެ ބައްދަލުވުމެއްގައި ސްޓެލްކޯގެ ޖެނެރަލް މެނޭޖަރ މުޙައްމަދު ސަލީމް ވިދާޅުވީ، މާދަމާ ނަގާ ރީޑިން ހިމަނައިގެން ތައްޔާރުކުރާ ބިލްތައް ދެއްކުމަށް 30 ދުވަހުގެ މުއްދަތެއް ދޭނެ ކަމަށެވެ. އާންމު ގޮތެއްގައި މުޅި މާލެ ސަރަޙައްދުގެ ރީޑިން ނެގުމަށް 12 ވަރަކަށް ދުވަސް ހޭދަވާއިރު، މިފަހަރު އެ މަސައްކަތް އެންމެ ދުވަހަކުން ނިންމުމަށް ވަނީ ރޭވިފައެވެ.

ސަލީމް އިތުރަށް ވިދާޅުވީ، ރޯދަމަހުގެ ބިލް ތައްޔާރުކުރުމަށްޓަކައި ރޯދައިގެ ފަހު ދުވަހުވެސް ރީޑިން ނަގައި ނިންމާނެ ކަމަށެވެ. މިފަހަރު ބިލް ތައްޔާރުކުރާނީ މާދަމާ އާއި ރޯދަމަހުގެ ފަހު ދުވަހު ނަގާ ރީޑިން ބޭނުންކޮށްގެން، މުޅި މަހަށް ވަކި ޚާއްސަ ބިލެއްގެ ގޮތުގައެވެ. މިގޮތަށް ހަދަން ނިންމި މައިގަނޑު ސަބަބަކީ މިދިޔަ އަހަރު ބިލްކޮށްފައި ހުރި ގޮތުން ދެ ބިލުންވެސް ޑިސްކައުންޓް ދޭން ޖެހުނު މައްސަލަ ހައްލުކުރުމަށް ކަމަށް ސަލީމް ވިދާޅުވިއެވެ.

ސްޓެލްކޯއިން ރައްޔިތުންނަށް ގޮވާލާފައިވަނީ މާދަމާ ކަރަންޓު ބިލަށް ރީޑިން ނަގަން ފަށާއިރު، މިކަމަށް ފުރިހަމަ އެއްބާރުލުން ދިނުމަށެވެ. ގޭގައި ގިނަ ވަގުތު ނޫޅޭނަމަ، އުޅޭނެ ވަގުތު ސްޓެލްކޯއަށް އަންގާލުމުން އެ ވަގުތަކާ ދިމާކޮށް ރީޑިން ނަގަން މުވައްޒަފުން ދާނެ ކަމަށް އެ ކުންފުނިން ބުނެފައިވެއެވެ.

ކަރަންޓު ބިލުން ޑިސްކައުންޓް ދިނުމުގައި މިދިޔަ އެއް އަހަރުގެ ކަރަންޓު ބޭނުންކޮށްފައިވާ މިންވަރަށް ބަލާނެ ކަމަށާއި، އަދި ޑިސްކައުންޓް ދޭނީ އިތުރުވާ އަދަދަށް ކަމަށްވެސް ސްޓެލްކޯއިން ބުނެފައިވެއެވެ.