އައްޑޫ ސިޓީއަށް ގެނެވުނު 1.8 މެގަވޯޓުގެ އައު ޖެނެރޭޓަރު ސެޓް ބެހެއްޓުމުގެ މަސައްކަތް ނިމި، ޚިދުމަތް ދޭން ފަށައިފިއެވެ.

އައްޑޫ ސިޓީގެ ހިތަދޫއާއި ގުޅިފައިވާ ރަށްތަކަށް ކަރަންޓުގެ ޚިދުމަތް ފޯރުކޮށްދޭ ސެންޓްރަލް ޕަވަރ ސްޓޭޝަނުގައި ބޭނުންކުރަމުންދިޔަ ޖެނެރޭޓަރު ސެޓްތަކުގެ ތެރެއިން ތިން ޖެނެރޭޓަރަށް މައްސަލަ ދިމާވެ، އަދި އިތުރު އެއް ޖެނެރޭޓަރު މަރާމާތު ނުކުރެވޭ ވަރަށް ހަލާކުވެފައިވުމުގެ ސަބަބުން، އެ ރަށްތަކަށް ބޭނުންވާ މިންވަރަށް ކަރަންޓު އުފެއްދުމުގައި ދަތިތަކެއް ކުރިމަތިވެފައިވެއެވެ. މީގެ ސަބަބުން އެކި ވަގުތުތަކުގައި އެކި ސަރަޙައްދުތަކުން ކަރަންޓު ކެނޑެމުންދިޔަ މައްސަލައަށް މިހާރު ފާހަގަކުރެވޭ މިންވަރެއްގެ ޙައްލެއް ލިބިގެންދާނެ ކަމަށް ބެލެވެއެވެ.