ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ބައި-އިލެކްޝަން މިއަދު ކުރިއަށްދާ ވާހަކަ އިލެކްޝަންސް ކޮމިޝަނުން ހާމަކޮށްފިއެވެ.
އިލެކްޝަންސް ކޮމިޝަނުގެ މަޢުލޫމާތު ދެއްވާ ފަރާތުން ވިދާޅުވި ގޮތުގައި، މިއަދު ބޭއްވޭ ބައި-އިލެކްޝަންގައި ހިމެނެނީ 2 ރަށެއްގެ ކައުންސިލް އިންތިޚާބާއި 10 ރަށެއްގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބެވެ.
މި އިންތިޚާބުގައި ހެނދުނު 10:00 އާ ހަމައަށް ވޯޓުލާފައިވަނީ 9.17 އިންސައްތަ ވޯޓު ދިނުމުގެ ޙައްޤު ލިބިފައިވާ ފަރާތްތަކުންނެވެ. އިލެކްޝަންސް ކޮމިޝަނުން އިތުރަށް ހާމަކުރެއްވި ގޮތުގައި، އިންތިޚާބުގެ ވޯޓުލުން ކުރިއަށްދާނީ މިއަދު ހެނދުނު 8:00 އިން ފެށިގެން ހަވީރު 4:00 އާ ހަމައަށެވެ.
މާލޭގައި ދިރިއުޅޭ ރަށްވެހިންނަށް ވޯޓުލުމަށް ޚާއްޞަކޮށްފައިވާ 4 ވޯޓު ފޮށި ބަހައްޓާފައިވަނީ މާފަންނު މަދަރުސާގައި ކަމަށް އިލެކްޝަންސް ކޮމިޝަނުން މަޢުލޫމާތު ދެއްވާފައިވެއެވެ.
އިންތިޚާބުތަކާބެހޭ ޤާނޫނަށް ގެނެވުނު އެންމެ ފަހުގެ އިޞްލާޙުގެ ދަށުން، ކައުންސިލްތަކާއި އަންހެނުންގެ ކޮމިޓީތަކުގެ ބައި-އިލެކްޝަންތައް ބާއްވަނީ އަހަރަކު ދެ ފަހަރުއެވެ. މި ގޮތުން، މި އަހަރުގެ ފުރަތަމަ ބައި-އިލެކްޝަނަށް ޖުމްލަ 5 ރަށެއްގެ ލޯކަލް ކައުންސިލް އިންތިޚާބާއި 28 ރަށެއްގެ އަންހެނުންގެ ކޮމިޓީތަކުގެ އިންތިޚާބުތަކަށް ހުޅުވާލެވުނެވެ.
އެހެންނަމަވެސް، 21 ރަށެއްގެ ބައި-އިލެކްޝަންތަކުގައި އެންމެ ކެންޑިޑޭޓަކު ވާދަކުރުމުގެ ސަބަބުން އެ ރަށްތަކުގެ ބައި-އިލެކްޝަންތައް ނުބޭއްވުމަށް ނިންމާފައިވެއެވެ.
