ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ރ. ކިނޮޅަހުގެ ފަތުރުވެރިކަމުގެ ދާއިރާއަށް އައު އުއްމީދެއް ގެނެސްދެއްވައިފައެވެ. އެމަނިކުފާނުގެ މާޅޮސްމަޑުލު އުތުރުބުރީގެ ދަތުރުފުޅުގައި ކިނޮޅަހަށް ވަޑައިގެން ރައްޔިތުންނާ ބައްދަލުކުރެއްވުމުގައި، ފަތުރުވެރިކަމުގެ ދާއިރާއިން އެ ރަށް ކުރިއަރުވައި ތަރައްޤީކުރުމަށް ސަރުކާރުން ޚާއްޞަ އިސްކަމެއް ދެއްވާނެކަން އިޢުލާނުކުރެއްވިއެވ.ެ
ކިނޮޅަހުގެ ފަތުރުވެރިކަމުގެ ދާއިރާއަށް ދިމާވެފައިވާ އެންމެ ބޮޑު ގޮންޖެހުމަކީ އަސާސީ ޚިދުމަތްތަކުގެ ދަތިކަމެވެ. މި މައްސަލަ ޙައްލުކުރުމަށްޓަކައި، ލޯކަލް ޓޫރިޒަމަށް ކަނޑައަޅާފައިވާ ސަރަޙައްދަށް ފެނާއި ނަރުދަމާގެ ޚިދުމަތް ފޯރުކޮށްދެއްވުމަށް ސަރުކާރުން ނިންމަވާފައިވާކަމުގެ އުފާވެރި ޚަބަރު ރައީސުލްޖުމްހޫރިއްޔާ ވަނީ އިޢުލާނުކުރައްވާފައެވެ.
ކިނޮޅަހަކީ ފަތުރުވެރިކަމުގެ ދާއިރާގައި ތަފާތު އައު ކޮންސެޕްޓެއް ތަޢާރަފުކޮށްފައިވާ ރަށެއްކަން ފާހަގަކުރައްވައި، މި އައު ވިސްނުން ކުރިއެރުވުމަށް ސަރުކާރުން ފުރިހަމަ އެއްބާރުލުން ދެއްވާނެކަމަށް ރައީސުލްޖުމްހޫރިއްޔާ ވަނީ ޔަޤީންކަން ދެއްވާފައެވެ. މި ގޮތުން، ލޯކަލް ޓޫރިޒަމް ތަރައްޤީކުރުމަށް ކަނޑައަޅާފައިވާ ސަރަޙައްދަށް ފެނާއި ނަރުދަމާގެ ޚިދުމަތް ފޯރުކޮށްދިނުމަކީ ސަރުކާރުން ދެއްވާ ޚާއްޞަ އެހީތެރިކަމެއްކަމުގައި އެމަނިކުފާނު ވިދާޅުވިއެވ.ެ
ކިނޮޅަހުގެ ފަތުރުވެރިކަމުގެ ދާއިރާގައި ފާހަގަކޮށްލެވޭ އެއް ޚާއްޞަ ކަމަކީ “އިބްނު ބަތޫތާ މަންޒިލް” އެވެ. މި މަންޒިލަކީ 14 ވަނަ ޤަރުނުގައި ރާއްޖެއަށް ޒިޔާރަތްކުރެއްވި މަޝްހޫރު ދަތުރުވެރިޔާ އިބްނު ބަތޫތާގެ ހަނދާން އާކޮށްދޭ ތަނެކެވެ. ބަނދަރުމަތީގައި ޤާއިމުކޮށްފައިވާ މި ޕާކުގައި އިބްނު ބަތޫތާގެ ދުނިޔޭގެ ދަތުރުތަކުގެ މަގު ޗާޓު ދައްކުވައިދޭ ކުރެހުމެއް ހިމެނިފައިވެއެވެ. މިއީ ކިނޮޅަހުގެ ފަތުރުވެރިކަމުގެ ދާއިރާގައި އެންމެ މަޤުބޫލު އެއް މަންޒިލެވެ.
ކިޔުންތެރިންގެ ހިޔާލު