ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވީ އެމަނިކުފާނުގެ ދަތުރުފުޅުތަކުގައި ވަޒީރުން ބައިވެރިކުރައްވަނީ ރަށްރަށުގެ މަޝްރޫޢުތައް އަވަހަށް ހިންގުމަށް ކަމަށެވެ. މިހެން ވިދާޅުވީ މާޅޮސްމަޑުލު އުތުރުބުރީގެ ބައެއް ރަށްތަކަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން، އަނގޮޅިތީމު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ވިދާޅުވީ، ރަށްރަށުގެ ކައުންސިލާއި އެހެނިހެން މުއައްސަސާތަކާއި ވަޒީރުންނާއި ބައްދަލުވެ، ވާހަކަ ދެކެވިގެން، މައްސަލަތައް ހައްލުކުރެވި، އަވަހަށް ކުރިއަށް ދެވޭނެގޮތާއި ނަތީޖާއާ ހަމައަށް ދެވޭނެގޮތް ކުޑަ ވަގުތުކޮޅެއްގެ ތެރޭގައި ވުމަކީ އެމަނިކުފާނު އެދިވަޑައިގަންނަވާގޮތް ކަމަށެވެ. އަދި ސަރުކާރުގެ ނިޒާމުގެ ތެރޭގައި ވަރަށް ގިނަ ފަހަރަށް، ސިޓީބިޓީ ބަދަލުކުރުމާއި ބިއުރޯކްރަސީގެ ތެރެއިން ކަންކަން ތާށިވާކަމަށާއި، މިއީ ސަރުކާރުތަކުގައި ދިވެހިރާއްޖެ ނޫނަސް އެކަން ހިނގާ އާންމު އުސޫލުކަން ފާހަގަކުރެއްވިއެވެ.
ރައީސުލްޖުމްހޫރިއްޔާ އަނގޮޅިތީމުގެ ފެނާއި ނަރުދަމާގެ މައްސަލަ ހައްލުކޮށްދެއްވާނެ ކަމުގެ ޔަޤީންކަން ދެއްވިއެވެ. އަދި އެ މަސައްކަތް ހަވާލުކުރި ކުންފުނިން ހަމަ އެ އަތޮޅުގެ އެހެން ރަށްރަށުގައިވެސް ނަރުދަމާގެ މަސައްކަތާއި ހަވާލުވެ އެ މަސައްކަތް ނުނިމި ހުއްޓިފައި ހުރިކަން ފާހަގަކުރައްވައި އެ ރަށްރަށުގައިވެސް ފެނާއި ނަރުދަމާގެ މައްސަލަ ހައްލުކޮށްދެއްވުމަށް ވަޢުދުވެވަޑައިގެންނެވިއެވެ.
މީގެ އިތުރުން، އަނގޮޅިތީމުގެ ބަނދަރުގެ މަސައްކަތް ނިންމައިދެއްވާނެ ކަމަށާއި، ސްކޫލާއި ޞިއްޙީ މަރުކަޒުގެ ތަރައްޤީއަށް ބޭނުންވާ ކަންކަން ކޮށްދެއްވާނެ ކަމުގެ ޔަޤީންކަންވެސް ރައީސުލްޖުމްހޫރިއްޔާ ދެއްވިއެވެ. އަދި ޒުވާނުންނަށް ބޭނުންވާ ކުޅިވަރުގެ ވަސީލަތްތައް ޤާއިމުކުރުމަށް އިސްކަންދެއްވާނެ ކަމަށާއި، އަންހެން ބޭފުޅުންނަށް ހޭންޑްބޯލް ކޯޓެއް އަޅުއްވައިދެއްވާނެ ކަމަށްވެސް ވިދާޅުވިއެވެ.
މި ބައްދަލުވުމުގައި، ބޭންކް އޮފް މޯލްޑިވްސްއިން ރަށުގައި އޭޓީއެމް ބެހެއްޓުމުގެ މަސައްކަތް ރަސްމީކޮށް ރަށު ކައުންސިލާ ހަވާލުކުރެވުނެވެ.
ކިޔުންތެރިންގެ ހިޔާލު