މީހެއްގެ ސައިކަލެއް ވަގަށް ނެގި ބަޔަކު ފުލުހުން އަތުލައިގަނެފި އެވެ.
އެ މީހުން ފުލުހުން ހައްޔަރުކުރީ ވަގަށް ނެގި ސައިކަލުގައި ވަންވޭއެއްގެ އިދިކޮޅަށް ބާރުސުޕީޑެއްގައި ދުއްވަމުންދަނިކޮށެވެ.
ވައްކަމުގެ ތުހުމަތުގައި ފުލުހުން ދެ މީހަކު ހައްޔަރުކޮށްފައިވާކަން ކްރިމިނަލް ކޯޓުގެ ބަންދު އަމުރުތަކުން އެނގެ އެވެ. އެއީ 30 އަހަރުގެ ފިރިހެނަކާއި 32 އަހަރުގެ ފިރިހެނެކެވެ.
މިތިރީސް އަހަރުގެ ފިރިހެން މީހާ ހައްޔަރުކުރީ ސައިކަލު ދުއްވަމުންދަނިކޮށެވެ. ކޯޓުގައި ފުލުހުން ވިދާޅުވީ ވަންވޭއާ އިދިކޮޅަށް ސައިކަލު ދުއްވާފައިދަނިކޮށް އޭނާ ގާތު މަޑުކުރުމަށް ބުނުމުން މަޑުކޮށްފައިނުވާ ކަމަށެވެ. އަދި އޭނާ ހިފެހެއްޓީ ފިލަން ދުއްވަނިކޮށް ކަމަށެވެ. އެއީ ބަންދު ރެކޯޑު ގިނަ ފަރާތެއްކަން ކޯޓު އަމުރުން އެނގެ އެވެ. އޭނާ 10 ދުވަހުގެ މުއްދަތަކަށް ބަންދުކުރުމަށް ކޯޓުން ވަނީ އަމުރުކުރައްވާފަ އެވެ.
މި މައްސަލައިގައި ހައްޔަރުކުރި 32 އަހަރުގެ މީހާ އިނީ ސައިކަލުގެ ފަހަތުގަ އެވެ. އޭނާ ފަސް ދުވަހުގެ މުއްދަތަކަށް ބަންދުކުރަން ކޯޓުން ވަނީ އަމުރުކުރައްވާފަ އެވެ.
