އިޤްތިޞާދީ މަސައްކަތްތަަކަށް ފަޅުރަށް ހަވާލުކުރުން ވެގެންދާނީ ކައުންސިލްތަކަށް ލިބުނު ބޮޑު ކުރިއެރުމެއްގެ ގޮތުގައެވެ. އެހެނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމުގެ ދަށުން، ކައުންސިލްތަކަށް އިޤްތިޞާދީ މަސައްކަތްތައް ކުރުމަށް ފަޅުރަށްތައް ދޫކުރުމުގެ ސިޔާސަތާ އެއްގޮތަށް، ޕްރޮޕޯސަލް ހުށަހެޅި ތިން ކައުންސިލަކަށް ފަޅުރަށްތައް ހަވާލުކުރުމަށް ސަރުކާރުން މިހާރުވަނީ ނިންމައިފިއެވެ.
މިމުހިންމު ނިންމުން އިޢުލާންކުރެއްވީ ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް އެވެ. އެމަނިކުފާނު މިއަދު އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި، ފަޅުރަށްތައް ހަވާލުކުރެވޭ ކައުންސިލްތަކަކީ ރ. އިންގުރައިދޫ ކައުންސިލް، ދާލު އަތޮޅު ކައުންސިލް އަދި ލ. މާވަށް ކައުންސިލެވެ.
މިކައުންސިލްތަކަށް ރަށްތައް ހަވާލުކުރުމުގެ މަސައްކަތް ކުރިއަށް ގެންދާނީ މާލީކަންކަމާއި ތަރައްޤީގެ ރޭވުންތެރިކަމާބެހޭ ވުޒާރާއާއި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވުޒާރާ ގުޅިގެންނެވެ.
މިނިންމުމަކީ ކައުންސިލްތަކަށް އިތުރު އާމްދަނީ ހޯދުމުގެ ފުރުޞަތު ފަހިކޮށްދޭ، އަދި އެ ރަށްތަކުގެ ތަރައްޤީގައި ކައުންސިލްތަކުގެ ދައުރު އިތުރަށް ފުޅާކުރެވޭނެ މުހިންމު ފިޔަވަޅެކެވެ. މިކައުންސިލްތަކަށާއި އެ ރަށްރަށުގެ ރައްޔިތުންނަށް ވަޒީރު އާދަމް ޝަރީފް ވަނީ ހޫނު މަރުޙަބާއެއް ދަންނަވާފައެވެ.
