ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ހުވަދު އަތޮޅުގެ ބައެއް ރަށްތަކަށް އެމަނިކުފާނު މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެއްމެ ތަފާތް އެއްކަމަކަށް ފެންނަނީ ދުވަސްވީ މީހުން ސަފުތަކުގެކުރިން ފެންނަމުންދާ މަންޒަރު އެވެ. ގިނަބަޔަކު އަބަދުވެސް ގަބުލު ކުރާގޮތުގައި ރަށްރަށަށް ރައީސް ކުރައްވާ ދަތުރުފުޅު ތަކުގައި ރަށުގެ ކައުންސިލަރުންނާއި، ރަށުގެ ބޭފުޅުންނަށް އެރަށެއްގެ ފުރަތަަ ބަރިން ޖާގަ ލިބެންޖެހެއެވެ. އެހެންނަމަވެސް މީގެ ކުރީގައި އަބަދުވެސް އެޖާގަ ލިބިގެންދަނީ އަރިހުގައި ވަޑައިގަންނަވާ ބޭފުޅުންނަށެެއެވެ. ރަށުގެ ޖަލްސާތަކަށް ތައްޔާރު ކުރާމީހުންގެ އިތުރުން ކައުންސިލަރުންވެސް މިތިބެނީ ތިން ހަތަރުބަރި ފަހަތުގައި އެވެ.
މީގެ ކުރީގައި މިރަށު ބާއްވަ ޖަލްސާތަކުގައި ކައުންސިލްގެ ވެރިންނަށްވެސް ރައީސާއި އެއްސަފަކުން ޖާގަނުލިބޭ، އެހެންނަމަވެސް މިހާރު މިކަން ބަދަލުވެ ރައީސް މުއިޒް އާއި ވަރަށް ކާރިން އެބަބައްދަލުވެވޭ. މިއީ ވަރަށް އުފާކުރާކަމެއް. އަދި ރަށުގެ ކަންވޮށިގެންވާ ގިނަބަޔަަކަށްވެސް ހަމަ އެޖާގަ އެބަލިބޭ – ކައުންސިލް މެމްބަރެއް
އެރަށެއްގެ ބައްދަލުވުންތަކުގައި އެރަށެއްގެ މީހުންނަށް އިސްކަންދޭން ފެށި މަންޒަރު ގިނަބަޔަކަށް ކަމުދިޔަ ކަމެކެވެ. މިނޫނަސް މިފަހަރު ރައީސްގެ ދަތުރުފުޅުން ފެނިގެން މިދަނީ ރައްޔިތުންނާއި އެމަނިފާނު ބަހައްޓަވާ ގާތްކަމާއި ލޯއްބެއެވެ. ދުވަހަކުވެސް ރައީސަކަށް ހުވަދު އަތޮޅުން ނުލިބޭހާ ލޯބި އެމަނިފާނަށް މިދަނީ ލިބަމުންނެއެވެ. ހުވަދު އަތޮޅު މީގެ ކުރީގައި ފާހަގަ ކުރެވިފައިވަނީ ސަރުކާރުތަކުން ވަރަށް އެކަހެރިކޮށްފައިވާ ބައެއްގެ ގޮތުގައި ކަމުގައި ހުވަދޫ ގިނަބަޔަކު އަބަދުވެސް ގަބުލްކުރެއެވެ. މިއީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވެރިކަމާއި ހަވާލުވިފަހުން ހުވަދޫ އަށް ކުރައްވާ ދެވަނަ ދަތުރެވެ.
