2024 ވަނަ އަހަރުގެ ނަޞްރުގެ ދުވަސް ފާހަގަކުރުމުގެ ގޮތުން މިއަދު ސިފައިންގެ މައި މަރުކަޒުގައި ޚާއްޞަ ރަސްމިއްޔާތެއްގައި 3 ނޮވެންބަރުގެ ހަނދާނީ ބިނާގައި ދިދަ ޖެހުމާއި ގާޑް މައުންޓް ކުރުމުގެ އިތުރުން ޝަހީދުންގެ ހަނދާނުގައި ސުކޫތެއް ބޭއްވުމާއި، 7 ބަޑީގެ ސަލާމެއްވެސް އެރުވުން ބާއްވައިފިއެވެ.

މިރަސްމިއްޔާތުގައި ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒުގެ ދެކަނބަލުންނާއި، އެމަނިކުފާނުގެ ނައިބު ޙުސައިން މުޙައްމަދު ލަޠީފްގެ އިތުރުން ދައުލަތުގެ ވަޒީރުންނާއި އިސްވެރިންނާއި ގިނަ އަދަދެއްގެ ސިފައިން ބައިވެރިވެވަޑައިގެންނެވިއެވެ.

ސިފައިންގެ މައި މަރުކަޒުގެ ހުޅަނގު ދެކުނު ކަނުގައި 2012 ވަނަ އަހަރު ޤާއިމްކުރެވުނު މިބިނާއަކީ 1988 ވަނަ އަހަރުގެ ނޮވެންބަރު މަހުގެ 3 ވަނަ ދުވަހު ރާއްޖެއަށް ދެވުނު ޢުދުވާނީ ޙަމަލާއިން ނަޞްރު ލިބުމުގެ ހަނދާނުގައި ޤާއިމްކުރެވުނު ބިނާއެކެވެ. މިބިނާ ފަރުމާކުރެވިފައިވަނީ ސިފައިންގެ މައި މަރުކަޒަށް ޓެރަރިސްޓުން ވަނުމަށް ފާރުގޮއްވާލި ބައިގެ ނަކަލެއްގެ ގޮތުގައެވެ.

ބިނާގައި ފެންނަން ހުރި އައްޑަނައިން ރަމްޒުކޮށްދެނީ ދިވެހިރާއްޖޭގެ ސިޔާދަތީ މިނިވަންކަން ދިފާޢުކުރުމަށް ސިފައިން ކުރި މަތިވެރި ޖިހާދެވެ. އައްޑަނައިގެ ވަށައިގެން ލިޔެފައިވާ ޤުރުއާން އާޔަތާއި އޭގެ ތަރުޖަމާއިން ދޭހަވަނީ ދިވެހި ސިފައިންނަކީ އިސްލާމީ މަތިވެރި އަޤީދާގެ ބާރުލިބިގެން ދީނާއި ޤައުމަށްޓަކައި ކޮންމެ ގުރުބާނީއަކަށްވެސް ތައްޔާރަށް ތިބި ބައެއްކަމެވެ.

ބިނާގައި ޖަހާފައިވާ 8 ދިދައިން ރަމްޒުކޮށްދެނީ އެދުވަހު ޝަހީދުވި 8 ސިފައިންނެވެ. އަދި ބިނާގެ ދެފަރާތުގައި ފަރުމާކޮށްފައިވާ 8 މާބޮނޑިން ފާހަގަކޮށްދެނީ އެ ސިފައިންގެ މަތިވެރި ގުރުބާނީއާއި ޒިކުރާއެވެ. މިދުވަހަކީ 6 ދިވެހި ޚާއިނުން ބޭރުގެ ނިރުބަވެރި ޖަމާޢަތަކާ ގުޅިގެން ރާއްޖޭގެ މައްޗަށް އަތްގަދަކުރަން އުޅުނު ދުވަހެވެ. މިޙަމަލާގައި ސިފައިންގެ 8 ބޭކަލުންނާއި އާންމު 11 ރައްޔިތުން ޝަހީދުވިއެވެ.