ކިރްގިސްތާނާ ދެކޮޅަށް ކުރުނު މެޗުންވެސް ރައްޖެ ބަލިވެއްޖެއެވެ. ރާއްޖޭގެ މައްޗަށް ކިރްގިސްތާން ކުރިހޯދީ 0-5 ގެ ނަތީޖާއަކުންނެވެ.
މި މެޗުގައި ކިރްގިސްތާނުން ޖެހި ފަސް ލަނޑުވެސް ޖެހީ ފުރަތަމަ ހާފްގައެވެ. މެޗު ފަށައިގެން 12ވަނަ މިނެޓުގައި ކިރްޤިސްޠާނުން ވަނީ ލަނޑެއްޖަހައި ލީޑުނަގާފައެވެ. ރާއްޖޭގެ ޑިފެންސްލައިނަށް ހެދުނު ގޯހެއްގެ ފައިދާ ނަގައި މިލަނޑު އެޓީމަށް ކާމިޔާބުކޮށްދިނީ އަޓަބައޭވް އެރްބޯލެވެ. އޭގެ އަށް މިނެޓުފަހުން އަސްޓަނަކޫލޮވް ސިރޮޒިއްދީން ވަނީ އެޓީމުގެ ދެވަނަ ލަނޑު ޖަހައިދީ ލީޑު ފުޅާކޮށްދީފައެވެ. ކިރްގިސްތާންގެ ތިންވަނަ ލަނޑު، 23 ވަނަ މިނެޓުގައި ޖަހައިދިނީ ފުރަތަމަ ލަނޑުވެސް ޖަހައިދިން އަޓަބައޭވް އެވެ. އަދި އޭގެ 10 މިނެޓުފަހުން، ޓީމުގެ ސެންޓަރ ބެކަކަށް ކުޅެމުންދިޔަ މުރްޒަކޯވް ވަލޭރީ ވަނީ ކިރްޤިސްޠާނުގެ ހަތަރުވަނަ ލަނޑު ޖަހައިދީފައެވެ. މެޗުގައި ކިރްގިސްތާންގެ ފަހު ލަނޑު، 42 ވަނަ މިނެޓުގައި ކާމިޔާބުކޮށްދިނީ ޖޮއެލް ކޯޖޯއެވެ.
މި މެޗުގައި ދިވެހި ކުޅުންތެރިންގެ ފަރާތުން ކުރީ މެޗަށްވުރެ ރަނގަޅު ކުޅުމެއް ފެނުނެވެ. ދެވަނަ ހާފުގައި ބަދަލު ތަކަކާއެކު ނުކުތް ދިވެހި ޓީމުން ވަނީ އެޓޭކުތަކެއްވެސް އުފައްދާފައެވެ. އެހެންނަމަވެސް އޮން ޓާގެޓަށް، ނުރައްކާތެރި ހަމަލާއެއް ފޮނުވާލެވިފައެއް ނުވެއެވެ. ރާއްޖެއިން އެންމެ ރަނގަޅު ހަމަލާތަކެއް އުފެއްދީ ޑިފެންޑަރު އީނާޒާއި ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންއެރި އަލީ ފާސިރުއެވެ.
ރަގު ބޮޑު ނަތީޖާއަކުން ރާއްޖެ ބަލިވިއިރު ބްރޭކުގައި ކުޅުނު ފުރަތަމަ މެޗުގައި ޗައިނާ އަތުން ރާއްޖެ ބަލިވީ 0-3ގެ ނަތީޖާއަކުންނެވެ.
ރާއްޖެއިން ކުޅޭ ފަހު މެޗުގައި ނުކުންނާނީ ލުބުނާނާ ދެކޮޅަށެވެ. އެމެޗު ކުޅޭނީ އަންނަ މަހުގެ އެއްވަނަ ދުވަހުއެވެ. އެ މެޗުޗެސް އޮންނާނީ ކިރްގިސްތާނުގައެވެ.
ކިޔުންތެރިންގެ ހިޔާލު