މާލެއިން ފުރައިގެން ގއ. އަތޮޅަށް ދަތުރުކުރި އުދަރެސް ބޯޓް އަޑިއަށް ދިޔައީ އަލިފާނުގެ ހާދިސާ ހިނގި ގއ. ވިލިނގިލީގައި ހުންނަ އަތޮޅު ތައުލީމީ މަރުކަޒަށް ސަރުކާރުން ފޮނުވި މުދަލާއެކުއެވެ.

މި މަހުގެ ތިން ވަނަ ދުވަހުގެ ރޭ އަލިފާނުގެ ހާދިސާއެއް ހިނގައި، ބޮޑެތި ގެއްލުންތަކެއް ލިބުމާ ގުޅިގެން، އެ ސްކޫލުގެ ކިޔެވުން އަލުން ފެށުމަށް ބޭނުންވާނެ ސާމާނު އެޑިޔުކޭޝަން މިނިސްޓްރީން ފޮނުވީ އުދަރެސް ބޯޓުގައެވެ.

އެނގިފައިވާގޮތުގައި އެ ބޯޓުގައި ހުރީ ސްކޫލުގެ ޕްރިންޓަރުތަކާއި އޭސީތަކާއި މުދައްރިސުންނާއި ދަރިވަރުންނަށް ބޭނުންވާނެ ލޮކަރުތަކާއި މި ނޫންވެސް ތަފާތު އަގު ބޮޑެތި ތަކެއްޗެވެ.

މި ހާދިސާ ހިނގިއިރު ބޯޓުގައި ތިބި ޖުމުލަ 13 މީހުންގެ ތިއްބެވެ. އޭގެތެރެއިން އެކަކު ވަނީ ފަތާފައި ލ. އޮޅުވެއްޔަށް އަރާފައެވެ. އެއީ ބިދޭސީއެކެވެ.

ބޯޓުން ދަތުރުކުރި އިތުރު 11 މީހަކު ރިސޯޓުގެ ދޯންޏަކަށް ނަގާފައިވެއެވެ.  އޭގެ ތެރޭގައި ހިމެނެނީ ދެ ދިވެހިންނާއި 9 ބިދޭސީންނެވެ.

އެ ބޯޓުން ގެއްލުނު 81 އަހަރުގެ ދިވެހި ފިރިހެނަކު ވަނީ ކަނޑުމަތިން ސަލާމަތްކޮށްފައެވެ.