ސަރުކާރަށް އިތުބާރުކޮށްފައި މާދަމާ ރައްޔިތުން ދެއްވާ ވޯޓަކީ ރައްޔިތުން މާޔޫސްވާނެ ވޯޓަކަށް ނުވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އިންތިޚާބުގެ ކެމްޕެއިން ނިންމުމަށް ބޭއްވި ހަރަކާތުގައި ވާހަކަފުޅު ދައްކަވަމުންނެވެ.
ރައީސް ވަނީ ސަރުކާރުން ކުރީ ސަރުކާރުގެ ދަރަނި އަދާކޮށްފައިވާނީ އެކަމަށްވެސް އަލިއަޅުއްވާލައްވާފައެވެ. ރައީސް ވިދާޅުވީ، އެމަނިފާނު ޤައުމާ ޙަވާލުވިއިރު ޤައުމު އޮތް ހާލަތު ދިވެހި ރައްޔިތުންނަށް ވަރަށް ރަނގަޅަށް ސާފުވާނެ ކަމަށެވެ. އިޤްތިޞާދު ނާޒުކު ފައްތަރެއްގައި އޮއްވައި އެމަނިކުފާނު މިހާހިސާބަށް ވަޑައިގެންނެވީ އެންމެ ފައިސާ ފޮއްޗެއް ވެސް ޗާޕުނުކޮށް ކަމަށް ރައީސް ވިދާޅުވިއެވެ.
މިދިޔަ ވެރިކަމުގައި ނެގި 500 މިލިއަން ޑޮލަރުގެ ދަރަންޏަކީ އަދާކުރާނެ ގޮތުގެ އެއްވެސް ޕްލޭނެއް ނެތި ނެގި ދަރަންޏެއް ކަމަށް ރައީސުލްޖުމްހޫރިއްޔާ ވިދާޅުވިއެވެ. މިއަދު އެ ސުކޫކު އަނބުރާ ދެއްކީ، ރައްޔިތުންނަށް ލިބޭ އިނާޔަތެއް އުނިނުކޮށް، ފައިސާ ޗާޕުނުކޮށް އަދި ޤައުމުގެ ރިޒާވް ރެކޯޑް އަދަދެއްގައި ބަހައްޓައިގެންކަމަށް ރައީސް ވިދާޅުވިއެވެ.
ދަރުމަވަންތަ ހޮސްޕިޓަލްވެސް ހުރީ ރަހުނުކޮށްފައި. އެތަންވެސް އެވަނީ އިރާދަކުރެއްވިއްޔާ މިނިވަންވެފައި. އައިޖީއެމްއެޗް އޮތީ މި ސުކޫކާ ގުޅުވާފައި ރަހުނުކޮށްފައި. އެތަންވެސް އެވަނީ މިނިވަންކޮށްފައި. ފިނޭންސް މިނިސްޓްރީގެ އިމާރާްވެސް އޮތީ ރަހުނުކޮށްފައި. އެތަންވެސް މިނިވަންވެއްޖެ.
ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ، ޤައުމާމެދު އެއްވެސް ވިސްނުމެއް ނެތްބަޔަކު ޤައުމަށްވާނެހާގޮތެއް ހަދާލާފަ ދޫކޮށްލާފަ ދިޔައީކަމަށެވެ. ނަމަވެސް އެކަމުން ސަލާމަތްކޮށް މިކަން ކޮށްފައިި މިނިންމީ އިތުރު އެއްވެސް ދަރަންޏެއް ރައްޔިތުންގެ ބޮލުގައި ނާރުވައިކަމަށްވެސް ރައީސް ވިދާޅުވިއެވެ.
ތިބޭފުޅުން އަޅުގަނޑުމެންނަށް އިތުބާރުކޮށްފައިދެއްވާ ވޯޓު ވެގެންދާނީ ތިބޭފުޅުން ފަޚުރުވެރިވާ ވޯޓަކަށް. އޭގެ ނަތީޖާ އަޅުގަނޑުމެން ނެރެދޭނެ ވޯޓަކަށް. ރައްޔިތުން ތެރެއިން އެއްވެސް ބޭފުޅަކު މާޔޫސްވެގެންދާނެ ވޯޓަކަށް އެ ވޯޓު ނުވާނެ
ރައީސުލްޖުމްހޫރިއްޔާ ވިދާޅުވިއެވެ.
ކިޔުންތެރިންގެ ހިޔާލު