ކުރިއަށް އޮތް މަސްތަކުގައި ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމަށްޓަކައި، ދުނިޔޭގެ އެންމެ މަޝްހޫރު ޑިޖިޓަލް ޕްލެޓްފޯމްތައް މެދުވެރިކޮށް ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން ބޮޑު އިޝްތިހާރު ކެމްޕޭނެއް ފަށައިފިއެވެ.

“ސީޒޭޝަނަލް ސަމަރ” ގެ ނަމުގައި އަންނަ އެޕްރީލް މަހުން ފެށިގެން ޖުލައި މަހުގެ ނިޔަލަށް ހިންގާ މި ކެމްޕޭން ކުރިއަށް ގެންދާނީ ގޫގުލް، ޑީވީ360، ޔޫޓިއުބް، ފޭސްބުކް އަދި އިންސްޓަގްރާމް ފަދަ ވަސީލަތްތައް ބޭނުންކޮށްގެންނެވެ. މި ހަރަކާތުގެ މައިގަނޑު އަމާޒަކީ އިންޓަނެޓުން ޗުއްޓީ މަންޒިލްތައް ހޯދާ މީހުންނާއި، އެންމެ ފަހު ވަގުތު ނުވަތަ “ލާސްޓް މިނިޓް” ބުކިންގް ހަދާ ފަރާތްތަކުގެ ސަމާލުކަން ރާއްޖެއަށް އަނބުރާލުމެވެ.

މި ކެމްޕޭނުގައި ޚާއްސަ އިސްކަމެއް ދެނީ ރާއްޖެއާ ކައިރި އަދި ދަތުރުފަތުރު ކުރުމަށް ފަސޭހަ މާކެޓްތަކަށެވެ. އެގޮތުން އިންޑިއާ، ޗައިނާ އަދި ރަޝިއާގެ އިތުރުން ސީއައިއެސް އާއި އޭސިއާން ގައުމުތަކަށް އަމާޒުކޮށްގެން “ހައިޕަރ-ޓާގެޓެޑް” މެސެޖުތަކެއް ފޯރުކޮށްދޭނެއެވެ. ވީއެމްސީން އަމާޒު ހިފާފައިވަނީ ސޯޝަލް މީޑިއާގެ ޒަރީއާއިން ޖުމްލަ 100 މިލިއަން މީހުންނާ ހަމައަށް ރާއްޖޭގެ މަޢުލޫމާތު ފޯރުކޮށްދިނުމަށެވެ.

ވީއެމްސީގެ ސީއީއޯ އިބްރާހީމް ޝިއުރީ ވިދާޅުވި ގޮތުގައި، ޒަމާނީ އެޑް-ޓާގެޓިންގް ބޭނުންކޮށްގެން ހިންގާ މި ކެމްޕޭނުގެ ސަބަބުން ހަމައެކަނި ރާއްޖެ އިޝްތިހާރުވުމުގެ ބަދަލުގައި، ސީދާ ރާއްޖެއަށް ފަތުރުވެރިން އައުމަށް ބާރުއެޅިގެންދާނެއެވެ. ގޫގުލް އާއި މެޓާގެ ނެޓްވޯކްތައް ގުޅުވައިގެން ހިންގާ މި މަސައްކަތާއެކު، އޭޝިއާ އަދި ސީއައިއެސް ސަރަހައްދުގެ ފަތުރުވެރިންގެ އެންމެ ފުރަތަމަ ޗޮއިސްއަކަށް ރާއްޖެ ހެދުމަކީ އެ ކުންފުނީގެ އެންމެ ބޮޑު އުންމީދެވެ.