ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމުގެ ތިން ވަނަ ފިޔަވަހީގެ މަސައްކަތް އަންނަ ހޮނިހިރު ދުވަހު ފަށާތީ ހެންވޭރު ފެރީ ޓާމިނަލުން ފެށިގެން ރަސްމީ ފާލަމާ ދެމެދުގެ ސަރަހައްދު އަންނަ ހޮނިހިރު ދުވަހުން ފެށިގެން ބަންދުކުރަން ނިންމައިފިއެވެ.
މިކަމާ ގުޅިގެން މާލޭ ސިޓީ ކައުންސިލުން ވަނީ އެ ސަރަހައްދުގައި އަޅާފައިވާ ކަނޑުއުޅަނދުތައް ނެގުމަށް އަންގާފައެވެ.
ހެންވޭރު ފެރީ ޓާމިނަލުން ފެށިގެން ރަސްމީ ފާލަމާ ހަމައަށް އޮންނަ ސަރަހައްދަކީ އާންމު ގޮތެއްގައި މާލެއިން އެއާޕޯޓަށް ދާ ފެރީތަކާއި، މާލެއާ ކައިރި ރަށްރަށަށް ދަތުރުކުރާ ފެރީތައް އަޅާފައި އޮންނަ ސަރަހައްދެވެ. އެ ސަރަހައްދުގައި އެމްއެންޑީއެފްގެ ކަނޑުއުޅަނދުފަހަރު ވެސް ހަރަކާތްތެރިވެއެވެ.
ސިޓީ ކައުންސިލުން ބުނީ މަސްވެރިންގެ ޕާކު ހިމެނޭ ސަރަހައްދުން ފެށިގެން ފަސް ނަންބަރު ފާލަމާ ހަމައަށް އޮންނަ ސަރަހައްދު މިމަހުގެ 30ވަނަ ދުވަހުން ފެށިގެން މަސައްކަތް ނިމެންދެން ބަންދުވާނެ ކަމަށެވެ. ފަސް ނަންބަރު ފާލަމުން ފެށިގެން އިއްޒުއްދީން ފާލަމާ ހަމައަށް އޮންނަ ސަރަހައްދު އަންނަ އޭޕްރިލް މަހުގެ 17ވަނަ ދުވަހުން ފެށިގެން މަސައްކަތް ނިމެންދެން ބަންދުވާނެއެވެ.
ބޮޑުތަކުރުފާނު މަގު ތަރައްގީކުރުމުގެ މަޝްރޫއުގެ ދަށުން މަސް މާރުކޭޓާއި އެއް ނަންބަރު ފާލަމާ ދެމެދު އޮންނަ ސަރަހައްދުގެ މަގު ފުޅާކޮށް ތާރު އަޅައި ޒަމާނީ ފެންވަރަށް ތަރައްގީކުރުމަށް ފަހު މިދިޔަ ޑިސެންބަރު މަހުގެ ތެރޭގައި ވަނީ ހުޅުވާފައެވެ.
ކިޔުންތެރިންގެ ހިޔާލު