ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހިމްގެ ނަމުގައި ފައިސާ ދޭކަމަށް ބުނެ މީސްމީޑިއާގައި ހިންގަމުންދާ ސްކޭމަކަށް ސަމާލުވުމަށް އެމަނިކުފާނު އިލްތިމާސްކުރައްވައިފިއެވެ.

ވަޓްސްއެޕް ގްރޫޕްތަކާއި މީސްމީޑިއާގެ އެކި މަންސަތަކުގައި ދައުރުކުރަމުންދާ މި ސްކޭމްގައި ބުނެފައިވަނީ، ރަމަޟާން މަހާ ދިމާކޮށް ނިކަމެތި އާއިލާތަކަށް 50،000 ރުފިޔާގެ ކޭޝް ސަޕޯޓެއް ގާސިމްގެ ފަރާތުން ދެއްވާ ކަމަށެވެ. މީހުންނަށް އޮޅުވާލުމުގެ ގޮތުން މި މެސެޖުތަކާއެކު އޭއައި ބޭނުންކޮށްގެން ހަދާފައިވާ ފޮޓޯއަކާއި، މައުލޫމާތު ފުރަންޖެހޭ ލިންކެއްވެސް ދަނީ ފަތުރަމުންނެވެ.

މިކަމާ ގުޅިގެން “އެކްސް” ގައި ކުރެއްވި ޕޯސްޓެއްގައި ގާސިމް ވަނީ މިއީ އެމަނިކުފާނާ އެއްވެސް ގުޅުމެއް ނެތް އޮޅުވާލުމެއްކަން ހާމަކުރައްވާފައެވެ. އަދި މިފަދަ މަކަރުވެރިންގެ އަމަލުތަކުގެ ސަބަބުން އެތައް ބައެއްގެ އަގުހުރި ވަގުތު ބޭކާރުވެ، އެތައް ބަޔަކަށް ނިކަމެތިކަމާއި ގެއްލުންތަކާ ކުރިމަތިލާންޖެހޭކަން ފާހަގަކުރައްވައި، މިފަދަ ނޭއްގާނީ އަމަލުތަކުން ރައްކާތެރިވެ ތިބުމަށް އާންމު ރައްޔިތުންނަށް އެމަނިކުފާނު ވަނީ ނަސޭހަތްތެރިވެވަޑައިގެންފައެވެ.