ފިތުރު އީދުގެ މުނާސަބަތުގައި، މި އަހަރުވެސް ރައީސް ޑރ. މުހަންމަދު މުއިއްޒުގެ ދެކަނބަލުން އީދު ސަލާން ކުރައްވަން ހަމަޖެހިފައިވާ ކަމަށް ރައީސް އޮފީހުން މިއަދު ބުނެފި އެވެ.

ރައީސް އޮފީހުން ބުނީ އީދުގެ ސަލާން ކުރެއްވުން އޮންނާނީ، އީދު ދުވަހުގެ ހެނދުނު 9:00 އިން 11:00 އަށް ރައީސުލްޖުމްހޫރިއްޔާގެ ރަސްމީ ގެކޮޅު، މުލީއާގޭގައެވެ.

އީދު ސަލާން ކުރުމަށް މުލީއާގެއަށް ވަނުމަށް ހަމަޖެހިފައި ވަނީ މެދުޒިޔާރަތް މަގަށް ހުންނަ މުލީއާގޭ ބޮޑު ދޮރޯށިންނެވެ. މުލީއާގެއަށް ދެވޭނީ، ޝަހީދު އަބްދުﷲ ޒުހައިރު ހިނގުމުން މެދުޒިޔާރަތް މަގުން ކަމަށް ރައީސް އޮފީހުން ބުންޏެވެ.

އީދު ސަލާން ކުރުމުގައި ހުރިހާ ރައްޔިތުންނާއި ދައުލަތުގެ އެކި މަގާމުތަކުގައި ތިއްބެވި ބޭފުޅުންނަށާއި ބޭރުގެ އިއްޒަތްތެރިންނަށާއި ރާއްޖޭގެ އެކި ކުންފުނިތަކާއި އަމިއްލަ އެކިއެކި ޖަމިއްޔާތަކުގެ މަންދޫބުންނަށް ރައީސްގެ ދެކަނބަލުން ވަނީ ދައުވަތު ދެއްވައިފައި ކަމަށް ރައީސް އޮފީހުން ބުންޏެވެ.

އޭގެ އިތުރުން، ރައީސްގެ ދެކަނބަލުން ވަނީ ހާއްސަކޮށް ކުޑަކުދިންނާއި ޒުވާނުންނަށް އީދު ސަލާމްކުރުމަށް ދައުވަތު ދެއްވައިފައިކަމަށް ރައީސް އޮފީހުން ބުންޏެވެ.