އައްޑޫ ސިޓީގެ ފޭދޫ ބަނދަރުގައި އަޅައިފައި އޮތް ޑައިވިން ދޯންޏެއްގައި އަލިފާން ރޯވި ހާދިސާގައި އެކަކު ފިހިފައިވާ ކަމަށް އެމްއެންޑީއެފް އިން ބުނެފިއެވެ.

އެމްއެންޑީއެފުން ބުނީ، ފޭދޫ ބަނދަރު ބޭރުގައި އަޅައިފައި އޮތް ޑައިވިން ދޯންޏެއްގައި އަލިފާން ރޯވެގެން އެމްއެންޑީއެފްގެ ދެކުނު ސަރަހައްދުގެ ކޮމާންޑުގެ ފަޔާ ސްޓޭޝަނުން ހަރަކާތްތެރިވި ކަމަށެވެ.

މި ހާދިސާގެ މައުލޫމާތު ލިބުނީ މިއަދު މެންދުރު 1:30 ވަނިކޮށް ކަމަށް، އެމްއެންޑީއެފުން ބުންޏެވެ. އަދި އަލިފާން ނިއްވުމުގެ މަސައްކަތްކުރަމުން ދަނިކޮށް މެންދުރުފަހު 3:30 ހާއިރު ދޯނި އެއްކޮށް އަޑިއަށް ގޮސްފައިވާ ކަމަށް ވެސް އެމްއެންޑީއެފް އިން ބުންޏެވެ.

އެމްއެންޑީއެފް އިން ބުނީ ޑައިވިން ދޯނީގައި އަލިފާން ރޯވުމުން، ދޯނީގައި ތިބި މީހުން އެރީ ކައިރީގައި އޮތް ސަފާރީއަކަށް ކަމަށް ކަމަށެވެ.

މި ހާދިސާގައި އެކެއްގެ ފައި ފިހިގެން ފޭދޫގެ ސިއްހީ މަރުކަޒުގައި ފަރުވާ ދިނުމަށްފަހު، މިހާރު ދޫކޮށްލާފައިވާ ކަމަށް ވެސް އެމްއެންޑީއެފް އިން ބުންޏެވެ.