މިޔަޓް ޖަމްއިއްޔާއާއި މަންފާ ޖަމްއިއްޔާއާއި ގުޅިގެން ކުރިއަށް ގެންދިއުމަށް ހަމަޖެހިފައިވާ “މިޔަޓް އިހްޔާ ފޯރަމް 1447” މިރޭ ކ. ތުލުސްދޫގައި ބާއްވަން ތައްޔާރުވާން ފަށައިފިއެވެ.

މިޔަޓްގެ ފަރާތުން “ވަގުތު” އަށް މައުލޫމާތު ދެމުން ވިދާޅުވީ މިރޭ ބާއްވަ އިހްޔާ ފޯރަމްވެސް ކުރިއަށް ގެންދަން ނިންމާފައިވާއިރު، ގުރުއަތުން ހޮވޭ ފަސް ފަރާތަކަށް އަގުހުރި ފަސް އިނާމެއް ދިނުމަށް ހަމަޖެހިފައިވާ ކަމަށެވެ.

ގުރުއަތުން ހޮވޭ ފަރާތްތަކަށް ދިނުމަށް ހަމަޖެހިފައި އިނާމު ތަކަކީ:

• ޓޯސްޓް މޭކާ
• 2 ތަށި ސެޓް
• އެއާ ފްރަޔާ
• ބްލެންޑާ

އިހްޔާ ފޯރަމް ބޭއްވުމަށް ހަމަޖެހިފައި ވަނީ މިރޭ 09:15 ގައި ތުލުސްދޫ ޕާކް ސަރަހައްދުގައެވެ. މިޔަޓް އިން ހާމަ ކުރިގޮތުގައި މިފަހަރުގެ އިހްޔާ ފޯރަމް އަކީ އެހެން އަހަރުތަކާއި ތަފާތުކޮށް ބޮޑުކޮށް ބޭއްވޭ ހަރަކާތެކެވެ.

މިޔަޓް އިން ވިދާޅުވީ އިނާމު ލިބޭ ފަރާތް ތަކުގެ ނަންތައް އިއުލާން ކުރުމަށް ހަމަޖެހިފައި ވަނީ ފޯރަމަށް ފަހުގައި ކަމަށެވެ. އަދި ގުރުއަތުން ނެގޭ ފަރާތް ފޯރަމުގައި ހާޒިރުވެ ނެތްނަމަ އަލުން ގުރުއަތު ނެގޭނެ ކަމަށްވެސް ވިދާޅުވިއެވެ.

މި ހަރަކާތުގެ އިތުރުން، މިއަދުގެ އަސްރު ނަމާދަށް ފަހު ތުލުސްދޫގެ ފިރިހެން ކުދިންނަށް ހާއްސަކޮށްގެން ބަންގި ގޮވުމުގެ ޕްރޮގްރާމެއްވެސް ބޭއްވުމަށް ވަނީ ހަމަޖެހިފައެވެ. އަދި ހަމަ މިއަދު މިޔަޓްގެ ފަރާތުން ބޮޑު ރޯދަ ވިއްލުމެއްވެސް ބޭއްވުމަށް ވަނީ ހަމަޖެހިފައެވެ.

މިރޭ ބޭއްވުމަށް ހަމަޖެހިފައިވާ އިހްޔާ ފޯރަމްގެ އިތުރުން ރޯދަ މަހުގެ ފަހު 10 ގައިވެސް އިތުރު ފޯރަމް އެއް ބޭއްވުމަށް ވަނީ ހަމަޖެހިފައެވެ.