އެންޓި ސްކޭމް ސެންޓަރުން ތަހުގީގު ކުރަމުންދާ މައްސަލައެއްގެ ތަހުގީގަށް ސުވާލުކުރުމަށްޓަކައި، ހޯދަން އިއުލާންކުރި އަންހެން މީހާ ހައްޔަރުކޮށްފިއެވެ.
ސްކޭމް މައްސަލައެއްގެ ތަހުގީގަށް ހާޒިރުކުރަން ބޭނުންވެގެން ފުލުހުން ފޮޓޯއާއެކު އާއްމުކޮށް ހޯދަން އިއުލާން ކުރީ ތ. ހިރިލަންދޫ، ނާގަލި، ޢާއިޝަތު ނާޛިރާ (41އ) އެވެ.
އޭނާ ހައްޔަރުކޮށް ކޯޓަށް ހާޒިރު ކުރުމުން މި މަހުގެ 19 ވަނަ ދުވަހާއި ހަމައަށް އޭނާ ބަންދުކޮށްފައި ބެހެއްޓުމަށް ކްރިމިނަލް ކޯޓުން ވަނީ އަމުރުކޮށްފައެވެ.
ފުލުހުން މި އަންހެން މީހާ ހޯދަން އިއުލާނުކުރީ، އޭނާ އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމުގެ ޗިޓު ރައްދުކުރެވިފައި ނުވާތީއެވެ.
އޭނާ ހާޒިރުކުރީ ސްކޭމްގެ މައްސަލައެއްގެ ތަހުގީގުގައި ތުހުމަތުކުރެވޭ ފަރާތެއްގެ ހައިސިއްޔަތުން ސުވާލުކުރުމަށެވެ. އޭނާގެ ބަންދު އަމުރުގައި ބުނެފައިވާ ގޮތުން މަކަރާއި ހީލަތުން ފައިސާ ހޯދާފައިވާ 14 މައްސަލައެއްގެ ތުހުމަތު މި އަންހެން މީހާގެ މައްޗަށް ކުރެވެއެވެ.
އޭނާ ބަންދު ކުރަން ނިންމި މަޖިލީހުގައި، އޭނާ ވަނީ އޭނާއަކީ ބަލި މީހެއް ކަމަށް ބުނެފައެވެ. އަދި ވަކީލެއްގެ ފުރުސަތު ދިނުމަށް އޭނާ އެދިފައިވެއެވެ.
ކިޔުންތެރިންގެ ހިޔާލު