ފަތުރުވެރިކަން އިޝްތިހާރު ކުރަން ދުނިޔޭގައި ބާއްވާ އެންމެ ބޮޑު އެއް ފެއާ، އައިޓީބީ ބާލިން 2026ގައި ވިޒިޓް މޯލްޑިވްސް ކޯޕަރޭޝަން، ވީއެމްސީން ބައިވެރިވެ ރާއްޖެ އިޝްތިހާރު ކުރަން ފަށައިފިއެވެ.
މިއަދު ފެށި އައިޓީބީ ފެއަރގައި ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ 67 ކުންފުންޏަކުން ޖުމްލަ 159 މީހުން ބައިވެރިވެއެވެ.

މިއަހަރުގެ ފެއަރގެ ހަވާސާގައި ތަފާތު އެކި ހަރަކާތްތައް ކުރިއަށްގެންދިއުމަށް ވަނީ ރޭވިފައެވެ. އެގޮތުން ނޫސްވެރިންގެ ބައްދަލުވުމެއް ބޭއްވުމަށް ހަމަޖެހިފައިވާއިރު، މި ބައްދަލުވުމުގައި ރާއްޖޭގެ ފަތުރުވެރިކަމާ ގުޅޭ މުހިންމު ކަންތައްތަކެއް އިޝްތިހާރުކުރާނެ ކަމަށް ވީއެމްސީން މައުލޫމާތުދެއެވެ. މީގެ އިތުރުން، މާދަމާ ރޭ ‘މޯލްޑިވިއަން ނައިޓް’ ގެ ނަމުގައި ހާއްސަ ހަރަކާތެއް ރިޓްސް ކާރލްޓަން ބާލިންގައި ބޭއްވުމަށް ވަނީ ހަމަޖެހިފައެވެ. މި ހަރަކާތުގައި ބައިނަލްއަގުވާމީ މީޑިއާތަކާއި ރާއްޖޭގެ ފަތުރުވެރިކަމުގެ ދާއިރާގެ އިސް ފަރާތްތަކުން ބައިވެރިވާނެއެވެ.

އައިޓީބީ ބާލިންއަކީ ދުނިޔޭގެ ފަތުރުވެރިކަމުގެ ސިނާއަތުގައި ބާއްވާ އެންމެ ބޮޑު އަދި އެންމެ ނުފޫޒުގަދަ ޓްރޭޑް ފެއަރ އެވެ. 1966 ވަނަ އަހަރުން ފެށިގެން މެދުނުކެނޑި ބާއްވަމުން އަންނަ މި ފެއަރއަކީ ދުނިޔޭގެ އެކި ކަންކޮޅުތަކުން ފަތުރުވެރިކަމުގެ ދާއިރާގެ މާހިރުންނާއި، ކުންފުނިތަކާއި، ކަމާބެހޭ ފަރާތްތައް އެއްތަނަކުން ބައްދަލުވާ މައި މަރުކަޒެވެ. މިމަހުގެ 5ވަނަ ދުވަހާއި ހަމައަށް ކުރިއަށްގެންދާ މި ބޮޑު ހަރަކާތަކީ ރާއްޖޭގެ ފަތުރުވެރިކަން ދުނިޔޭގެ ބާޒާރުގައި އިތުރަށް ވަރުގަދަކޮށް، އާ މާކެޓްތަކަށް ވާސިލުވުމަށް ލިބޭ ރަނގަޅު ފުރުސަތެއް ކަމަށް ސަރުކާރުން ގަބޫލުކުރެއެވެ.