މ. ރަތްމަންދޫ ރައްޔިތުން މާލެ އަތޮޅު ތުލުސްދޫއަށް ބަދަލުކުރުމަށް، އެރަށު ކައުންސިލުން މިހާރު ބިން ހަމަޖައްސައިދީފައިވާކަން ރަތްމަންދޫ ކައުންސިލަށް އަންގާފައިވާކަމަށް ޢިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރައިން ވިދާޅުވެއްޖެއެވެ. ރަތްމަންދޫގެ އާބާދީއަކީ، 240 ނަމަވެސް ރަށުގައި އުޅެނީ 80 ވަރަކަށް މީހުންނެވެ. އޭގެތެރެއިން %34 މީހުންގެ އަމިއްލަ ބޯހިޔާވަހިކަމެއް ނެތެވެ. އަދި ރަށުގައި އަސާސީ ޚިދުމަތްތައްވެސް އެންމެ އެކަށީގެންވާ ގޮތުގައި ލިބެމުން އައިސްފައެއް ނުވެއެވެ.

ވުމާއެކު އެރަށުގެ ރައްޔިތުން އެދެނީ އެހެން ރަށަކަށް ބަދަލުވުމަށެވެ. ރަތްމަންދޫގެ ރައްޔިތުން އެހެން ރަަށަކަށް ހިޖުރަކުރަން ނިންމައިފިނަމަ، ގެދޮރު ބިނާކުރަން ފަށާތާ 1 އަހަރު ދުވަހުގެ ތެރޭގައި ރަތްމަންދޫ ރައްޔިތުން އެހެން ރަށަކަށް ބަދަލު ކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވީ، މިދިޔަ އަހަރުގެ ސެޕްޓެމްބަރު މަހު އެރަށަށް ވަޑައިގެން ރައްޔިތުންނާއެކު ބޭއްވެވި ބައްދަލު ކުރެއްވުމުގައެވެ.

ރައީސް ވިދާޅުވެފައިވަނީ، މާލެ ކައިރި ރަށަކަށް ދިރިއުޅުން ބަދަލު ކުރުމުގެ ފުރުޞަތު ދޭނެ ކަމަށެވެ. ޚިދުމަތްތައް ފުރިހަމަ ރަށަކަށް ދިރިއުޅުން ބަދަލުކުރުމަށް ރަތްމަންދޫގެ ބޮޑު އާބާދިއެއް ބޭނުންވެއެވެ.

އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން ބުނީ، ރަތްމަންދޫ ރައްޔިތުން ބަދަލު ކުރުމަށް ނިންމާފަވަނީ ކ.އަތޮޅު ތުލުސްދޫއަށް ކަމަށެވެ. ރަތްމަންދޫ ރައްޔިތުން ތުލުސްދޫއަށް ބަދަލު ކުރުމުގެ މަސައްކަތް ކުރިއަށް ގެންދިއުމަށްޓަކައި ކ.ތުލުސްދޫގައި އާބާދުވުމަށް ބޭނުންވާ 44 ގޯތި ހަމަޖައްސައި، އެކަން ތުލުސްދޫ ކައުންސިލުން ވުޒާރާއަށް އަންގާފައިވާ ކަމަށް އެވުޒާރާއިން ބުންޏެވެ. އެހެންކަމުން މި މަޝްރޫޢު ކުރިއަށް ގެންދިއުމަށްޓަކާއި ކުރަންޖެހޭ މަސައްކަތްތައް ވުޒާރާއިން މިހާރު ފަށާފައިވާކަން މ.ރަތްމަންދޫ ކައުންސިލަށް، ވުޒާރާގެ ފަރާތުން ރަސްމީކޮށް މިވަނީ އަންގާފައެވެ.

އެއްފަސްކުރުމުގެ މަސައްކަތުގެ ދަށުން، ރައީސުލްޖުމްހޫރިއްޔާގެ ތަޞައްވުރަކީ ރަށުގައި ރަޖިސްޓަރކޮށްފައިވާ ކޮންމެ ގެއަކަށް، ބަދަލުވާ ރަށުގައި 3 ކޮޓަރީގެ ގެއެއް އަޅައިދިނުމެވެ. އަދި މިގޮތަށް ހިޖުރަކުރާ އާއިލާތަކަށް މިހާރު ދެމުންދާ 50،000ގެ އިނާޔަތް ރިވައިޒްކޮށް އަދަދު ބޮޑުކުރައްވާނެ ކަމަށް ސަރުކާރުން ވަނީ ބުނެފައެވެ.