ސްޓެލްކޯގައި ކުރިއަށްގެންދިޔަ ފަޔަރ ވޯޑަން – ޓްރެއިން ދަ ޓްރެއިނަރ ޕްރޮގްރާމްގެ ބައިވެރިންނަށް ސެޓްފިކެޓްދީފިއެވެ.

މި ޕްރޮގްރާމުގެ ބައިވެރިންނަށް ސެޓްފިކެޓް ދީފައިވަނީ އެކަމަށްޓަކައި މިއަދު ސްޓެލްކޯގައި ބޭއްވި ރަސްމިއްޔާތެއްގައެވެ.

މި ޕްރޮގްރާމް ފުރިހަމަކޮށް ސްޓެލްކޯގެ 30 މުވައްޒަފުން މިއަދު ވަނީ ސެޓްފިކެޓް ޙާޞިލްކޮށްފައެވެ.

ބައިވެރިންނަށް ސެޓްފިކެޓް ދެއްވީ ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ޗީފް އެގްޒެކެޓިވް ހިސާން ޙަސަން އާއި ސްޓެލްކޯ ހިންގެވުމާއި ޙަވާލުވެވަޑައިގެން ހުންނެވި ޑެޕިއުޓީ މެނޭޖިންގ ޑިރެކްޓަރ ޑރ. އަލީ އަޒްވަރެވެ.

ފަޔަރ ވޯޑަން “ޓްރެއިން ދަ ޓްރޭނަރ” މި ޕްރޮގްރާމަކީ، މަސައްކަތުގެ މާޙައުލުގައި އަލިފާނުގެ ހާދިސާތަކުން ރައްކާތެރިވުމުގެ މިންގަނޑުތައް ހަރުދަނާކުރުމަށާއި، ކުއްލި ޙާލަތްތަކަށް ތައްޔާރުވެފައިވާ މިންވަރު އިތުރުކުރުމަށްޓަކައި، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ އާ ގުޅިގެން ކުރިއަށްގެންގޮސްފައިވާ ތަމްރީނު ޕްރޮގްރާމެކެވެ.

މި ޕްރޮގްރާމަކީ، ކުއްލި ހާލަތްތަކުގައި ފަޔަރ ވޯޑަނުންގެ މަސްއޫލިއްޔަތު އަދާކުރުމަށް އެހެން މުވައްޒަފުން ތަމްރީނުކުރުމަށް ބޭނުންވާ ޢިލްމާއި، ޢަމަލީ ހުނަރާއި، އުނގަންނައިދިނުމުގެ ފަންނީ ޤާބިލުކަން މުވައްޒަފުންގެ ކިބައިގައި އަށަގަންނުވައި، ސްޓެލްކޯގައި ތަމްރީނު ދިނުމުގެ ޤާބިލުކަން އިތުރުކުރުމަށް ހިންގާފައިވާ ޕްރޮގްރާމެކެވެ. މި ޕްރޮގްރާމްގައި ކިޔަވައިދެއްވާފައިވަނީ ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އާއި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ ތަޖުރިބާކާރުންނެވެ.

މިއަދުގެ ރަސްމިއްޔާތުގައި ވާހަކަފުޅު ދައްކަވަމުން ސްޓެލްކޯ ހިންގެވުމާއި ޙަވާލުވެވަޑައިގެން ހުންނެވި ޑެޕިއުޓީ މެނޭޖިންގ ޑިރެކްޓަރ ޑރ. އަލީ އަޒްވަރު ވިދާޅުވީ މި މަސައްކަތަކީ 2024 ވަނަ އަހަރު ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީއާއެއްކޮށް ވެވުނު އެމްއޯޔޫއެއްގެ ދަށުން ކުރަމުން އައި ޙަރަކާތްތަކުގެ ތެރެއިން އެއްބައި ކަމަށެވެ.

“އޭގެތެރޭ ހިމެނޭ އެއްކަންތައް އެމަރޖެންސީ ރެސްޕޮންސް ޕްލޭނެއް ތައްޔާރުކުރުމުގެ ކަންތައް. އޭގަ ހިމެނޭ އެއް ކަމަކީ އިވެކުއޭޝަން ޕްލޭނެއްގެ މަސައްކަތް. އެކަމަށްޓަކާ އަޅުގަނޑުމެން ތައްޔާރުކުރަންޖެހޭ ފަޔަރ ވޯޑަނުން ތައްޔާރުކުރުން މި އެކްސަސައިޒްގަ މި ގެންދެވުނީ. އެކަމަށް އިތުރު ބޭފުޅުން ތައްޔާރުކުރުމުގެ ގޮތުން ފުރަތަމަ ޓްރެއިން ދަ ޓްރެއިނަރސް މި ހިންގުނީ. ކުންފުނީގެ ލެވެލްގަ މި ބޭފުޅުންގެ ބޭނުން ހިފައިގެން އަދި އިތުރު މުވައްޒަފުންނަށް އެ ބޭފުޅުނުންނަށް އެ ލިބިލެއްވި ތަމްރީނުގެ އަލީގަ މި ޙަރަކާތް އިތުރަށް އަދި ކުރިއަށްއޮތް ތާނގަ އެބޭފުޅުން ކުރިއަށް ގެންގޮސްދެއްވާނެ،” އޭނާ ވިދާޅުވިއެވެ.