ކީރިތި ޤުރުއާނުގެ ޢިލްމު ފެތުރުމަށާއި އެކަމަށް ހޭލުންތެރިކަން އިތުރުކުރުމަށްޓަކައި، ހަމައެކަނި މިދިޔަ އަހަރުގެ ތެރޭގައި 19 މިލިއަން ރުފިޔާ ޚަރަދުކޮށްފައިވާކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޙާފިޒުން ދަސްވެނިވުމަށް ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން މިނިސްޓަރު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވި ފަހުން، ވޭތުވެދިޔަ ދެ އަހަރެއްހާ ދުވަހުގެ ތެރޭގައި ޤުރުއާނުގެ ޢިލްމު ކުރިއެރުވުމަށް ޚާއްސަ އިސްކަމެއް ދެއްވާފައިވާ ކަމަށެވެ. އެގޮތުން ޙާފިޒުންނަށް ދެވޭ އެލަވަންސް ދެގުނައަށް ބޮޑުކުރެއްވުމާއި، ޤައުމީ ޤުރުއާން މުބާރާތުގެ އިނާމުތައް މަތިކުރެއްވުން ފަދަ މުހިންމު ބަދަލުތައް މިނިސްޓަރު ފާހަގަކުރެއްވިއެވެ.
މިނިސްޓަރު ޝަހީމް އިތުރަށް ވިދާޅުވީ ކީރިތި ޤުރުއާނަށް ޚިދުމަތްކުރުމާއި ހިތުދަސްކުރުމުގެ ރޫޙު މުޅި ރާއްޖޭގައި އާލާކުރުމުގައި މިހާރު މިދެކެނީ ވަރަށް އުފާވެރި އަދި ހެޔޮ ދުވަސްތަކެއް ކަމަށެވެ. އަދި ސަރުކާރުގެ އަމާޒަކީ މީހުން ދިރިއުޅޭ ކޮންމެ ރަށެއްގައި ކީރިތި ޤުރުއާނާ ބެހޭ ޤައުމީ މަރުކަޒުގެ ގޮތްޕެއް ޤާއިމުކުރުން ކަމަށްވެސް އޭނާ ވިދާޅުވިއެވެ. މި މަސައްކަތުގެ ދަށުން މިއަހަރު 50 ގޮފި އުފެއްދުމަށް ކަނޑައަޅާފައިވާއިރު، މިހާތަނަށް 6 ގޮފި ރަޖިސްޓްރީކޮށް، އިތުރު 34 ގޮތްޕެއްގެ ރަޖިސްޓްރޭޝަން މަސައްކަތް ހިނގަމުންދާކަން މިނިސްޓަރު ހާމަކުރެއްވިއެވެ.
މީގެއިތުރުން، ޤައުމު ބިނާކުރުމުގައާއި ރާއްޖެއަކީ އިސްލާމީ ޤައުމެއްގެ ގޮތުގައި ދެމެހެއްޓުމަށްޓަކައި ޙާފިޒުންގެ ދައުރު މުހިންމުކަން ފާހަގަކުރައްވައި، ޒުވާނުންނަށް މިނިސްޓަރު ވަނީ ޚާއްސަ އިލްތިމާސެއް ކުރައްވާފައެވެ. އެގޮތުން ކުރިއަށް އޮތް ޖީލުތަކަށް އިސްލާމީ ރިސާލަތު ފޯރުކޮށްދިނުމަށްޓަކައި، ޒުވާނުން ޙާފިޒުންގެ ގޮތުގައާއި އިމާމުންގެ ގޮތުގައި ނުކުތުމަށް މިނިސްޓަރު އެދިވަޑައިގެންނެވިއެވެ.
ކިޔުންތެރިންގެ ހިޔާލު