އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަ ކޮށްލައިފި ކަމަށް ބުނެ ފަތުރަމުންގެންދާ ވާހަކަތައް، ޚާމަނާއީގެ އޮފީހުން ދޮގުކޮށްފިއެވެ.

ތެހެރާނަށް ދިން ވަރުގަދަ ވައިގެ ހަމަލާތަކުގައި ޚާމަނާއީ އަވަހާރަ ކޮށްލެވިފައިވާ ކަމަށް ފުރަތަމަ ރިޕޯޓްކުރީ ޒަޔަނިސްޓު މީޑިއާއިންނެވެ.

އޭގެފަހުން، މުޖުރިމު ނަތަންޔާހޫ ފިލާހުރެ ނެރުނު ވީޑިއޯ ބަޔާނެއްގައި ބުނެފައިވަނީ، އީރާނަށް ދެވުނު ހަމަލާތަކަށްފަހު “ފެންނަ ނިޝާންތަކުން” ޚާމަނާއީ އަވަހާރަވެފައިވާ ކަމަށް ބެލެވޭ ކަމަށެވެ.

އޭގެފަހުން، އެމެރިކާގެ ހަނގުރާމައިގެ ރައީސް ޑޮނަލްޑް ޓްރަމްޕްވެސް ވަނީ، ޚާމަނާއީ އަވަހާރަ ކޮށްލެވިފައިވާ ކަމަށް ބުނެފައެވެ. ޓްރަމްޕް އެކަން ހާމަކޮށްފައިވަނީ އޭނާގެ އަމިއްލަ ޓުރުތު ސޯޝަލްގައި ޕޯސްޓްކުރި މެސެޖެއްގައެވެ.

އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީގެ އޮފީހުން ނެރުނު ބަޔާނެއްގައި ބުނެފައިވަނީ، ޚާމަނާއީ އަވަހާރަ ކޮށްލެވިއްޖެ ކަމަށް ބުނެ ދުޝްމަނުން ވާހަކަތައް ފެތުރުމަކީ ނަފްސާނީގޮތުން މީހުންގެ ހިތްތަކާ ކުޅެލުމަށް ރާވައިގެން ކުރާ ކަމެއް ކަމަށެވެ.

ޚާމަނާއީ ގަދަވެ ސަލާމަތުން އެބަ ހުންނެވި ކަމަށާއި، އެމެރިކާއާއި އިސްރާއީލާ ދެކޮޅަށް އީރާނުން ކުރަމުންދާ ހަނގުރާމައިގެ އިސް ކޮމާންޑްގައި އިންނެވީވެސް ޚާމަނާއީ ކަމަށް ބުނެފައި ވެއެވެ.

އީރާނުގެ ޚާރިޖީ ވަޒީރު އައްބާސް އަރަޣްޗީވެސް، ތަންކޮޅެއް ކުރިން މީޑިއާއަށް ދެއްވި އިންޓަރވިއުއެއްގައި ވިދާޅުވީ، ރޫހީ ލީޑަރާއި، އީރާނުގެ ރައީސާއި، ޕާލަމެންޓުގެ ރައީސްވެސް ސަލާމަތުން އެބަ ތިއްބެވި ކަމަށް އެނގިފައިވާ ކަމަށެވެ.

އީރާނަށް ދިން ވައިގެ ހަމަލާތަކުގައި ޚާމަނާއީގެ އިތުރުން، އަވަހާރަ ކޮށްލެވިފައިވާ ކަމަށް ބުނެ އިސްރާއީލުން ވަނީ އީރާނު ވެރިންގެ ލިސްޓެއް އާންމުކޮށްފައެވެ.

އެ ލިސްޓުގައި، ރޫހީ ލީޑަރު އާޔަތުﷲ އަލީ ޚާމަނާއީގެ އިތުރުން ދެން ހިމެނެނީ، ޚާމަނާއީގެ އިސް މުޝީރު އަލީ ޝަމްޚާނީއާއި، ޑިފެންސް މިނިސްޓަރ އަޒީޒް ނާސިރުޒާދީއާއި، ރޫހީ ލީޑަރުގެ އަސްކަރީ ބިއުރޯގެ ވެރިޔާ މުހައްމަދު ޝީރާޒީއާއި، އައިއާރްޖީސީގެ ވެރިޔާ މުހައްމަދު ޕަކްޕައުރުއާއި، ޖާސޫސީ ވެރިޔާ ސާލިހް އަސަދީއެވެ.

މިއިން އެއްވެސް ބޭފުޅަކަށް ކަމެއް ވީކަމަށް އީރާނުން އަދި ހާމަކޮށްފައެއް ނުވެއެވެ. އީރާނުގެ ރަސްމީ މީޑިއާއިންވެސް އިސްރާއީލާއި އެމެރިކާގެ ވާހަކަތައް ދޮގު ކުރެއެވެ.

އެކަމަކު، އީރާނުގެ ފާރސް ނޫހުން ބުނެފައިވަނީ، އެމެރިކާއާއި އިސްރާއީލުން ދިން ވައިގެ ހަމަލާތަކެއްގައި ރޫހީ ލީޑަރު އާޔަތުﷲ އަލީ ޚާމަނާއީގެ ދަރިކަނބަލުންނާއި، ދަނބިދަރިކަލުންނާއި އަދި ކާފަދަރިކަލަކު އަވަހާރަވެފައިވާ ކަމަށެވެ. ހަމަލާ އަމާޒުވީ އެ ބޭފުޅުން ކޮންތަނެއްގައި ތިއްބަވަނިކޮށް ކަމެއް ހާމަކޮށްފައެއް ނުވެއެވެ.

އިސްރާއީލުން މިހާރުވެސް އީރާނުގެ ވެރިރަށް ތެހެރާނަށް ބޮންއަޅަމުން ގެންދާއިރު، އެމެރިކާގެ ހަނގުރާމައިގެ ރައީސް ޓްރަމްޕް އޭނާގެ ޓުރުތު ސޯޝަލްގައި ލިޔުނު ޕޯސްޓެއްގައި އީރާނު ސިފައިންނަށާއި ފުލުހުންނަށް ގޮވާލާފައިވަނީ ރައްޔިތުންނާ ގުޅިގެން އީރާނު ސަރުކާރު ވައްޓާލުމަށެވެ.

އަދި އެމެރިކާއާއި އިސްރާއީލުން އެއްދުވަސްތެރޭ ދިން ވައިގެ ހަމަލާތަކުގައި އީރާނުގެ ބޮޑުބައެއް ސުންނާފަތި ކޮށްލެވިފައިވާ ކަމަށާއި، އެމެރިކާގެ މަގްސަދު ހާސިލްކުރުމަށް ހަފްތާއަކަށް ނުވަތަ އެއަށް ވުރެންވެސް ދިގު މުއްދަތަކަށް އީރާނަށް ވައިގެ ހަމަލާތައް ދިނުން ކުރިއަށް ދާނޭ ކަމަށްވެސް ޓްރަމްޕް ބުނެފައި ވެއެވެ.