ކުރިއަށް އޮތް 1447 ވަނަ އަހަރުގެ ރަމަޟާން މަހުގެ ތެރޭގައި ފެމިލީ ކޯޓުން ކައިވެނިކޮށްދިނުމަށް ހަމަޖެހިފައިވާ ވަގުތުތައް އެ ކޯޓުން މިއަދު އާންމުކޮށްފިއެވެ.

ފެމިލީ ކޯޓުން ނެރުނު އިޢުލާނެއްގައިވާ ގޮތުން، ރަމަޟާން މަހު ކޯޓުގެ ތެރޭގައާއި ކޯޓުން ބޭރުގައި ކައިވެނިކޮށްދިނުމަށް ވަކި ހާއްސަ ގަޑިތަކެއް ވަނީ ކަނޑައަޅާފައެވެ.

ރަސްމީ ދުވަސްތަކާއި ހުކުރު، ހޮނިހިރު ނޫން ބަންދު ދުވަސްތަކުގައި ކޯޓުގައި ކައިވެނިކޮށްދޭނީ ހެނދުނު 9:30 އިން 12:00 އަށް، މެންދުރުފަހު 2:00 އިން 4:30 އަށް، އަދި ރޭގަނޑު 9:45 އިން 11:45 އަށެވެ.

ހަފުތާ ބަންދު ދުވަސްތައް ކަމަށްވާ ހުކުރު އަދި ހޮނިހިރު ދުވަހު ކޯޓުގައި ކައިވެނިކޮށްދިނުމަށް ހަމަޖެހިފައިވަނީ ރޭގަނޑު 9:45 އިން 10:45 އަށެވެ.

ކޯޓުން ބޭރުގައި ކައިވެނިކޮށްދިނުމަށް ހަމަޖެހިފައިވަނީ ހުކުރު ދުވަސް ފިޔަވައި އެހެން ހުރިހާ ދުވަހެއްގެ މެންދުރުފަހު 2:00 އިން 4:30 އަށް އަދި ރޭގަނޑު 9:45 އިން 10:45 އަށެވެ. ހުކުރު ދުވަހު ކޯޓުން ބޭރުގައި ކައިވެނިކޮށްދޭނީ ހަމައެކަނި ރޭގަނޑު 9:45 އިން 10:45 އަށެވެ.