ގއ. ކޮނޑޭ އަދި ކ. ކާށިދޫގައި ޕަބްލިކް-ޕްރައިވެޓް ޕާޓްނާޝިޕް (ޕީޕީޕީ) މޮޑެލްގެ ދަށުން، ވިޔަފާރި އުސޫލުން ދަނޑުވެރިކަން ކުރުމުގެ ފުރުސަތު އެގްރިކަލްޗާ މިނިސްޓްރީން ހުޅުވާލައިފިއެވެ.

އެގްރިކަލްޗާ މިނިސްޓްރީން އިއްޔެ ބުނީ ކޮނޑޭ އަދި ކާށިދޫގައި ވިޔަފާރި އުސޫލުން ދަނޑުވެރިކަން ކުރުމުގެ މަޝްރޫއެއް ފަރުމާކޮށް، ތަރައްގީކޮށް އަދި ހިންގާނެ ގާބިލު ދިވެހި އަދި ބޭރުގެ ކުންފުނިތަކަށް ނުވަތަ ޖަމިއްޔާތަކަށް ޕްރޮޕޯސަލް ހުށަހެޅުމުގެ ފުރުސަތު ހުޅުވާލާ ކަމަށެވެ.

“މި އިސްނެގުމަކީ ރާއްޖޭގެ ކާނާގެ ރައްކާތެރިކަން ކަށަވަރުކުރުމަށާއި، ދެމެހެއްޓެނިވި ދަނޑުވެރިކަން ކުރިއެރުވުމަށާއި، އަދި އަމިއްލަ ފަރާތްތަކުގެ އިންވެސްޓްމަންޓާއި ތަޖުރިބާގެ ބޭނުން ހިފައިގެން ރައްޔިތުންގެ ދިރިއުޅުމުގެ ފެންވަރު މަތިކުރުމަށް ސަރުކާރުން ކުރަމުންދާ މަސައްކަތުގެ ތެރެއިން ކުރިއަށްދާ މަޝްރޫއެއް،” އެގްރިކަލްޗާ މިނިސްޓްރީން ބުންޏެވެ.

މިނިސްޓްރީން ބުނީ އެ މަޝްރޫއަށް ހޮވޭ ފަރާތަކުން، މޫސުމީ ބަދަލުތަކަށް ހޭނިފައިވާ، ވިޔަފާރީގެ ގޮތުން ފައިދާހުރި އަދި ރަށު ފެންވަރުގައި ރައްޔިތުންގެ ބައިވެރިވުން ހިމެނޭހެން، ގައުމީ ކާނާގެ ރައްކާތެރިކަމުގެ މަޝްރޫއަށް އެއްބާރުލުން ލިބޭނެ ފަދަ ނަމޫނާ ދަނޑުވެރިކަމުގެ ނިޒާމެއް ގާއިމުކުރަންވާނެ ކަމަށެވެ.

އެ މަޝްރޫއަށް ޝައުގުވެރިވާ ފަރާތްތަކުން، މައުލޫމާތު ކަރުދާހާއި އެއާ ގުޅޭ ލިޔެކިޔުންތަކުގައި ހިމަނާފައިވާ އުސޫލުތަކާއި ޝަރުތުތަކާ އެއްގޮތްވާ ގޮތުގެ މަތިން ޕްރޮޕޯސަލް ހުށަހެޅުމަށް އެދޭ ކަމަށެވެ. އަދި ޒަމާނީ ދަނޑުވެރިކަމުގެ ޓެކްނޮލޮޖީ ބޭނުންކުރުމާއި އުފެއްދުންތަކުގެ އަގު އިތުރުކުރުމާއި (ވެލިއު އެޑިޝަން)، ރަށު ފެންވަރުގައި ވަޒީފާގެ ފުރުސަތުތައް އުފެއްދުމުގެ އިތުރުން ދަނޑުވެރިންނާއި ޒުވާނުންގެ ހުނަރާއި ގާބިލުކަން އިތުރުކުރުމަށް އިސްކަންދޭ ޕްރޮޕޯސަލްތައް ހުށަހެޅުމަށް އެގްރިކަލްޗާ މިނިސްޓްރީން ބާރުއަޅާ ކަމަށެވެ.

އެ މަޝްރޫއާ ގުޅޭ މައުލޫމާތެއް ސާފުކުރަން ބޭނުންވާނަމަ ނުވަތަ ސުވާލެއް އޮތްނަމަ، އަންނަ މަހުގެ އެއްވަނަ ދުވަހުގެ 13:00 ގެ ކުރިން [email protected] އަށް ލިޔުމުން ހުށަހަޅަންޖެހެއެވެ. ހުށަހަޅާ މައުލޫމާތުގެ ހަމަހަމަކަން ގާއިމުކުރުމަށްޓަކައި ސާފުކޮށްދޭ ކަންކަން، އެ މަސައްކަތަށް ޝައުގުވެރިވާ ހުރިހާ ފަރާތްތަކަކާ ހިއްސާކުރުމަށް ހަމަޖެހިފައިވެއެވެ.

ފުރިހަމަކުރެވިފައިވާ ޕްރޮޕޯސަލްތައް (ޓެކްނިކަލް އަދި ފައިނޭންޝަލް)، ޕްރޮޕޯސަލް ހުށަހަޅަންޖެހޭ ސުންގަޑި، އަންނަ މަހުގެ 26 ވަނަ ދުވަހުގެ 13:00 ގެ ކުރިން [email protected] އަށް އީމެއިލް މެދުވެރިކޮށް ފޮނުވަން އެގްރިކަލްޗާ މިނިސްޓްރީން އެދިފައިވެއެވެ. ގަޑިޖެހިގެން ހުށަހަޅާ ޕްރޮޕޯސަލްތަކާއި މައުލޫމާތު ފުރިހަމަނުވާ ޕްރޮޕޯސަލްތައް ބަލައެއް ނުގަނެވޭނެ ކަމަށްވެސް އެ މިނިސްޓްރީން ބުންޏެވެ.

އެކަމާ ގުޅުންހުރި އިތުރު މައުލޫމާތު 3309309 މިނިސްޓްރީގެ ނަމްބަރަށް ގުޅާލުމުން ނުވަތަ އީމެއިލް [email protected] އަށް މެއިލްކުރުމުން ލިބޭނެ ކަމަށްވެސް އެގްރިކަލްޗާ މިނިސްޓްރީން ބުންޏެވެ.