ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުފުޅާ އެއްގޮތަށް، ބޭންކް އޮފް މޯލްޑިވްސް (ބީއެމްއެލް) ގެ ކްރެޑިޓް ކާޑުތަކުން ޑޮލަރު ބޭނުންކުރެވޭ ލިމިޓުތައް މާދަމާ، ފެބްރުއަރީ 1 ވަނަ ދުވަހުން ފެށިގެން ބޮޑުވެގެންދާނެއެވެ. މިއީ ރައްޔިތުންނަށް ޑޮލަރު ލިބުމުގައި ހުރި ދަތިތައް ހައްލުކޮށްދެއްވުމަށް ސަރުކާރުން ކުރައްވަމުން ގެންދަވާ މަސައްކަތްތަކުގެ ތެރެއިން ގެނެވޭ މުހިންމު ބަދަލެކެވެ.

މި ބަދަލާއެކު ކާޑުތަކުގެ ލިމިޓަށް އަންނަ ކުރިއެރުންތަކަށް ބަލާއިރު، ކުރިން 750 ޑޮލަރުގެ ލިމިޓެއް އޮތް ‘ކްލެސިކް’ ކާޑުތަކުގެ ލިމިޓު 1400 ޑޮލަރަށް އަދި ‘ގޯލްޑް’ ކާޑުތަކުގެ ލިމިޓު 1500 ޑޮލަރަށް އިތުރުވެގެންދާނެއެވެ. މީގެ އިތުރުން ‘ޕްލެޓިނަމް’ ކާޑުތަކުން މީގެ ކުރިން 1500 ޑޮލަރު ބޭނުންކުރެވެމުން ދިޔަ ނަމަވެސް، މާދަމާއިން ފެށިގެން އެ އަދަދު 2000 ޑޮލަރަށް ބޮޑުވެގެންދާނެ ކަމަށް ބޭންކުން ވަނީ ހާމަކޮށްފައެވެ.

މި ބަދަލު ގެނައުމަށް ހަމަޖެހިފައިވާކަން ރައީސުލްޖުމްހޫރިއްޔާ އެންމެ ފުރަތަމަ ހާމަކުރެއްވީ ނިމިދިޔަ އަހަރުގެ ސެޕްޓެމްބަރު މަހު ‘އެކްސް’ ގައި ކުރެއްވި ޕޯސްޓެއްގައެވެ. އެމަނިކުފާނު ވިދާޅުވެފައިވަނީ 2026 ވަނަ އަހަރުގެ ފެބްރުއަރީ މަހުގެ ފުރަތަމަ ދުވަހުން ފެށިގެން ކްރެޑިޓް ކާޑުތަކުގެ ލިމިޓު ބޮޑުކުރެވިގެންދާނެ ކަމަށާއި، މިއީ ރައްޔިތުންނަށް ލުއިފަސޭހަ ކޮށްދިނުމުގެ ގޮތުން ނިންމެވި ނިންމެވުމެއް ކަމަށެވެ. މިކަމުގެ ތަފްސީލުތައް ބީއެމްއެލްއިން ވަނީ މިދިޔަ ހަފްތާގައި ރަސްމީކޮށް އާންމުކޮށްފައެވެ.

ކްރެޑިޓް ކާޑުގެ އިތުރުން، މިދިޔަ އަހަރުގެ ނޮވެމްބަރު މަހުން ފެށިގެން ބީއެމްއެލްއިން ވަނީ ޑެބިޓް ކާޑުގެ ލިމިޓުތަކަށްވެސް ހެޔޮ ބަދަލުތަކެއް ގެނެސްފައެވެ. އެގޮތުން ޑެބިޓް ކާޑު ބޭނުންކޮށްގެން ރާއްޖެއިން ބޭރުގެ ޕީއޯއެސް މެދުވެރިކޮށް 1000 ޑޮލަރުގެ ވިޔަފާރި ކުރެވޭގޮތް ހަމަޖައްސާފައިވާއިރު، ޓިކެޓް ގަތުމާއި ހޮޓެލް ބުކިންގ ހެދުމަށް 3000 ޑޮލަރުގެ ލިމިޓެއް ވަނީ ކަނޑައަޅާފައެވެ. އަދި ބޭސްފަރުވާއަށް ރާއްޖެއިން ބޭރަށް ދާ ފަރާތްތަކަށް، ބޭންކުގައި އެދުމުން ކާޑު މެދުވެރިކޮށް ފައިސާ ދެއްކޭނެ ޚާއްޞަ އިންތިޒާމުތަކެއްވެސް ބޭންކުން ވަނީ ހަމަޖައްސައިދީފައެވެ.