ތ. ވިލުފުށީގައި އެއާޕޯޓެއް ތަރައްޤީކުރުމަށް ކުރާ މަސައްކަތުގެ ދަށުން އެރަށުގެ ބިންހިއްކުމުގެ މަސައްކަތުގެ 80 އިންސައްތަ ނިމިފައިވާ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން ވިދާޅުވެއްޖެއެވެ.
ވިލުފުށީ އެއާޕޯޓު ތަރައްޤީ ކުރުމުގެ މަސައްކަތް ހަވާލުކޮށްފައިވަނީ މިދިޔަ އަހަރު ސެޕްޓެންބަރު މަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިލުއްފުއްޓަށް ކުރެއްވި ދަތުރުފުޅުގެ ތެރެއިންނެވެ. މިމަސައްކަތް ހަވާލުކޮށްފައިވަނީ އެމްއޭސީއެލްއާއެވެ. އެއަރޕޯޓު ތަރައްޤީކުރުމަށް ބޭނުންވާ ބިންހިއްކުމުގެ މަސައްކަތް ފަށައި މިހާރު ބޮޑުބައެއް ވަނީ ނިންމާފައެވެ.
މިމަޝްރުޢޫގެ މަސައްކަތުގެ ދަށުން ބިން ހިއްކުމުގެ 80 އިންސައްތަ ނިމިފައިވާ ކަމަށް އެމްއޭސީއެލްއިން ވިދާޅުވިއެވެ. ހިއްކުމަށް ކަނޑައެޅިފައިވާ 81 ހެކްޓަރުގެ ތެރެއިން މިއީ 61 ހެކްޓަރުގެ ބިމެވެ.
ވިލުފުށީގައި ތަރައްޤީކުރާ އެއާޕޯޓު ހިންގާނީވެސް އެމްއޭސީއެލްގެ ފަރާތުންނެވެ. މި އެއާޕޯޓަކީ 1800 މީޓަރުގެ ރަންވޭއަކާއެކު ތަރައްޤީކުރާ އެއަރޕޯޓެކެވެ. މިމަޝްރޫޢުގެ މަސައްކަތް 2 އަހަރާއި 6 މަސް ދުވަހުގެ ތެރޭގައި ނިންމާއިރު މަޝްރޫޢުގެ ދަށުން ރަންވޭއާއި ޓަމިނަލް ބިލްޑިން ފަޔަރ ބިލްޑިން އަދި އެނޫންވެސް އެއަރޕޯޓަކަށް ބޭނުންވާ ހުރިހާ ވަސީލަތެއް ފުރިހަމަކޮށް ޤާއިމްކުރާނެއެވެ.
ވިލުފުށީ އެއާޕޯޓު ތަރައްޤީކުރުމުގެ މަސައްކަތް އިފްތިތާޙްކޮށްދެއްވައި، ބިން ހިއްކުމުގެ މަޝްރޫޢުގެ މަސައްކަތް ފަށްޓަވައި ދެއްވުމަށް ފަހު އެރަށުގެ ރައްޔިތުންނާއި ބައްދަލުކުރައްވާ ރައީސުލްޖުމްހޫރިއްޔާ ވަނީ މިމަސައްކަތް މިދައުރު ތެރޭ ތެރޭގައި ނިންމަވައިދެއްވާނެކަމަށެވެ.
ކިޔުންތެރިންގެ ހިޔާލު