ގިރާވަރުފަޅުގެ ލޭންޑްޔޫސް ޕްލޭނަށް ބަދަލު ގެނެސް، މިނިސްޓްރީ އޮފް ފިނޭންސް އެންޑް ޕްލޭނިން އިން މިއަދު އާންމުކޮށްފިއެވެ.

އެ މިނިސްޓްރީން ބުނީ މިއަދު އާންމުކުރި ޕްލޭނަކީ އޮކްޓޫބަރު 15، 2024 ގައި ގެޒެޓުކުރި ޕްލޭނަށް ބަދަލުތަކެއް ގެނައުމަށްފަހު އެކުލަވާލާފައިވާ ޕްލޭނެއް ކަމަށެވެ.

މިއަދު އާންމުކުރި އާ ލޭންޑްޔޫސް ޕްލޭނުގައި އެކި ބޭނުންތަކަށް ޚާއްސަ ކުރެވިފައިވާ ސަރަހައްދުތައް ވަނީ ތަފާތު ކުލަތަކުން ފާހަގަކޮށްފަ އެވެ. އޭގެ ތެރޭގައި ކޮމާޝަލް ބޭނުންތަކާއި، ކޮމިއުނިޓީ ޒޯންތަކާއި، ސުކޫލުތަކުގެ އިތުރުން ހޮސްޕިޓަލަށް ޚާއްސަ ބިންތައް ހިމެނެ އެވެ. ކުރީގެ ސަރުކާރުން ގޯތި ދޫކުރިއިރު އަސާސީ ޚިދުމަތްތަކަށް ޖާގަ ކަނޑަނާޅާ އޮތުމުން، މި ސަރުކާރުން ވަނީ އާ ޕްލޭނެއް އެކުލަވާލާނެ ކަމަށް މީގެ ކުރިން ބުނެފަ އެވެ. ގިރާވަރުފަޅުގެ ލޭންޑްޔޫޒް ޕްލޭނަށް 2024 ގައި ބަދަލު ގެނައީ އެ ސަބަބައްޓަކައިއެވެ.

މާލޭ ރައްޔިތުންނަށް ގޯތި ދީފައިވާ ހުޅުމާލެ ފޭސް ތިނެއް ހިއްކައި މިހާރު ވަނީ ނިމިފައެވެ. ރައީސް ޑރ. މުހައްމަދު މުއިއްޒު ވިދާޅުވީ ދެން އެންމެ އަވަހަށް ހިއްކައި ނިންމާނީ ގިރާވަރުފަޅު ކަމަށެވެ. ސަރުކާރުގެ އަމާޒަކީ ކުރިއަށް އޮތް ދެ މަސް ތެރެ އެ ފަޅު ހިއްކައި ނިންމުމެވެ.

ކުރީ ސަރުކާރުން ގިރާވަރުފަޅުގެ 170 ހެކްޓަރުގެ ބިމުން 5,186 ގޯތި ދޫކުރުމަށް ނިންމާފައި އޮތް ނަމަވެސް، އެއީ އެ ސަރަހައްދުގެ އާބާދީއާ ބަލާއިރު ދިރިއުޅުމަށް އެންމެ އެކަށީގެންވާ މާހައުލެއް ގާއިމުކުރެވޭނެ އަދަދެއް ކަމަށް ގަބޫލުނުކުރެއްވޭ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބް ވަނީ މީގެ ކުރިން ވިދާޅުވެފަ އެވެ. އެހެންކަމުން، އެތަނުގެ ތޮއްޖެހުން ކުޑަކުރުމަށްޓަކައި 1,114 ގޯތި ގުޅިފަޅަށް ވަނީ ބަދަލުކޮށްފައެވެ.