ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ބިންގާ އަޅައި، އިމާރާތްކުރި ފުރަތަމަ ސްކޫލް ކަމަށްވާ “ޝަހީދު އަލީ ސްކޫލް” ގެ މަސައްކަތްތައް އެއްކޮށް ނިންމައި، ދިރާސީ އާ އަހަރުގެ ކިޔެވުން ފެށުމަށް ތައްޔާރުވެއްޖެއެވެ. އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވަނީ އެ ސްކޫލަށް ޒިޔާރަތްކުރައްވައި، މާދަމާ ސްކޫލް ހުޅުވުމަށްޓަކައި ވާންޖެހޭ އެންމެ ފަހުގެ ތައްޔާރީތައް ބައްލަވާލައްވާފައެވެ.

މިނިސްޓަރު ޝަފީއު ވިދާޅުވި ގޮތުގައި މާދަމާ މި ސްކޫލް ރަސްމީކޮށް ހުޅުވާއިރު، 1،950 ދަރިވަރުންނަށް މިހާރު ވަނީ ޖާގަ ކަށަވަރުކޮށްދެވިފައެވެ. އަދި މި ދަރިވަރުންނަށް އުނގަންނައިދިނުމުގެ މުހިންމު ޒިންމާ އަދާކުރުމަށް 230 މުދައްރިއްސުންގެ ޓީމެއް ވެސް ވަނީ އެކުލަވާލެވިފައެވެ. ތައުލީމީ ދާއިރާއަށް ރައީސް މުއިއްޒު ދެއްވާ ޚާއްސަ އިސްކަމެއްގެ ދަށުން، 2023 ވަނަ އަހަރުގެ ޑިސެމްބަރު މަހުގެ 23 ވަނަ ދުވަހު ބިންގާ އެޅި މި ސްކޫލްގެ މަސައްކަތް ނިންމާލެވިފައި މިވަނީ ދެ އަހަރެއްހާ ދުވަހުގެ ތެރޭގައެވެ.

އާރުސީސީއާ ހަވާލުކޮށްގެން އިމާރާތްކުރި މި ސްކޫލަކީ ރާއްޖޭގެ އެހެން ސްކޫލްތަކާ އަޅާބަލާއިރު ތަފާތު، ޒަމާނީ ވަސީލަތްތަކެއް ހިމެނޭހެން ފަރުމާކޮށްފައިވާ ތަނެކެވެ. އެގޮތުން، ސްކޫލްގެ ހުރިހާ ކްލާސްރޫމެއް އޭސީކޮށްފައިވާއިރު، އާންމުކޮށް ސްކޫލްތަކުގައި ހުންނަ ހޯލްގެ އިތުރުން ހާއްސަ އޮޑިޓޯރިއަމްއެއް މި ސްކޫލުގައި ގާއިމްކޮށްފައިވެއެވެ. މީގެ އިތުރުން ފެންވަރު ރަނގަޅު ލައިބްރަރީއަކާއި، ސައިންސް އަދި ކޮމްޕިއުޓަރު ލެބްތައް ހިމެނެއެވެ. އަދި 20 މީހުންގެ ޖާގައިގެ ތިން ލިފްޓާއި، ހަކަތަ ކުޑަކުރުމަށް ސޯލާ ޕެނެލް ސިސްޓަމް ވެސް ވަނީ ހަރުކޮށްފައެވެ.

ސްކޫލްގެ ތައްޔާރީތަކާ ގުޅޭގޮތުން ވާހަކަދައްކަވަމުން ވަޒީރު ފާހަގަކުރެއްވި ގޮތުގައި، ކްލާސްރޫމްތަކާއި ލެބޯޓްރީތަކަށް ބޭނުންވާ ފަރުނީޗަރު ލިބި، ސެޓްއަޕްތައް ހެދި، ކިޔެވުން ފެށުމަށް ބޭނުންވާ ހުރިހާ އިންތިޒާމެއް މިހާރު ވަނީ ފުރިހަމަވެފައެވެ. އެހެންކަމުން މާދަމާ ދަރިވަރުން ސްކޫލަށް ހާޒިރުވާއިރު، ޝަހީދު އަލީ ސްކޫލް އޮންނާނީ ދަރިވަރުންނަށް މަރުހަބާ ކިޔުމަށް ފުރިހަމައަށް ތައްޔާރުވެފައި ކަމަށް ވަޒީރު ވިދާޅުވިއެވެ.