ތެލަސީމިއާ ކުދިންނަށް ދިމާވެފައިވާ ލޭ ލިބުމުގެ މައްސަލައަށް ހައްލު ހޯދުމަށް އެހީތެރިވުމުގެގޮތުން އެޗްޑީސީގެ މުވައްޒަފުން ލޭ ހަދިޔާކުރަން ތައްޔާރުވެއްޖެއެވެ.

އެޗްޑީސީން ބުނީ އެ ކުންފުންޏާއި މޯލްޑިވިއަން ބްލަޑް ސާވިސް (އެމްބީއެސް) ގުޅިގެން މާދަމާ ލޭ ހަދިޔާކުރުމުގެ ކޭމްޕެއް ކުރިއަށްގެންދިއުމަށް ނިންމާފައިވާ ކަމަށެވެ.

އެ ކުންފުނިން ބުނިގޮތުގައި މިއީ، ރާއްޖޭގެ ބަލްޑް ބޭންކުން ވަރަށް ބޮޑަށް ލޭ މަދުވެ، ވީހާވެސް އަވަހަކަށް ލޭ ހަދިޔާކުރުމަށް އެމްބީއެސް އިން ކުރި އިއުލާނާ ގުޅިގެން ކުރިއަށްގެންދާ ޑޮނޭޝަން ކޭމްޕެކެވެ. މި ކޭމްޕުގެ މަގްސަދަކީ ބްލަޑް ބޭންކުން މި ދަނޑިވަޅުގައި ލޭ މަދުވެފައިވާތީ، އެކަމަށް ހައްލު ހޯދައިދިނުމަށް އެޗްޑީސީ ސްޓާފުންގެ ފަރާތުން އެހީތެރިވުންކަމަށް ވެސް އެ ކުންފުނިން ބުންޏެވެ.

މި ދުވަސްވަރަކީ ސްކޫލް ބަންދު ޗުއްޓީއަށް ވުމާއެކު ތެލަސީމިއާ ކުދިންނަށް ލޭ ލިބުމުގައި ދަތިތަކެއް ވަނީ ކުރިމަތިވެފައެވެ. އެހެންވެ، މޯލްޑިވްސް ބްލަޑް ސާވިސް އިން ވަނީ އާންމުންގެ އެހީތެރިކަމަށް އެދިފައެވެ.