އަންނަ މަހުގެ މެދު ތެރޭގައި ފެށޭ މިއަހަރުގެ ރޯދަ މަހު، ސްކޫލްތަކުގައި ކިޔެވުން އޮންނާނީ ފުރަތަމަ ހަފުތާގައި އެކަނި ކަމަށް އެޑިއުކޭޝަން މިނިސްޓްރީން ބުނެފިއެވެ.

އެޑިއުކޭޝަން މިނިސްޓްރީން އިއްޔެ ވަނީ އަންނަ އަންގާރަ ދުވަހު ފެށޭ ދިރާސީ އާ އަހަރުގެ ކަލަންޑަރު އާންމުކޮށްފައެވެ.

އެކެޑެމިކް ކަލަންޑަރުގައިވާ ގޮތުން މިމަހުގެ 27 ވަނަ ދުވަހަކީ އާ އަހަރުގެ ކިޔެވުން ފަށާ ދުވަހެވެ. އަދި އަންނަ މަހުގެ 18 ވަނަ ދުވަހަކީ ރޯދަ މަހުގެ ފުރަތަމަ ދުވަހެވެ. އެއާއެކު ޖެހިގެން އަންނަ 19 ވަނަ ދުވަހަކީ ސްކޫލުތައް ބަންދު ދުވަހެކެވެ.

އެކެޑެމިކް ކަލަންޑަރުގައިވާ ގޮތުން ރޯދަ މަހު ސްކޫލުތަކުގެ ކިޔެވުން އޮންނާނީ 22-26 ފެބްރުއަރީއަށް އެކަންޏެވެ.

އެއަށްފަހު ޖެހިގެން އަންނަ ހުކުރާއި ހޮނިހިރަށް ފަހު މާޗު އެއްވަނަ ދުވަސް ވަނީ ޓީޗަރުންގެ ޕީޑީ ދުވަހަށެވެ. ޕީޑީ ދުވަހުގެ ހަރަކާތްތައް އެއް ހަފުތާއަށް ދެމިގެންދާއިރު އެ ދުވަސްތަކުގައި ދަރިވަރުން ކިޔަވަން ސްކޫލަށް ދާން ނުޖެހޭ ދުވަސްތަކެއްގެ ގޮތުގައި މިނިސްޓްރީން ވަނީ ކަނޑައަޅައިފައެވެ.

ރޯދަ މަހުގެ ފަހު 10 އަކީވެސް ބަންދު ދުވަސްތަކެވެ.

ކަލަންޑަރުގައިވާ ގޮތުން ރޯދަ މަސް ނިންމައި ސްކޫލްތަކުގައި އަލުން ކިޔަވައިދޭން ފަށާނީ މާޗު 23 ގައެވެ.