އަދާލަތު ޕާޓީގެ ހަތަރުވަނަ ދައުރުގެ ރައީސަކަށް ކުރިމަތިލި އިކްރާމް އަބްދުއްސައްތާރު އިންތިހާބުގެ އިންސާފުވެރިކަމާ މެދު ސުވާލު އުފައްދެވުމަށްފަހު ނަން އަނބުރާ ގެންގޮސްފިއެވެ.

މިކަން ހާމަކުރުމުގެގޮތުން އިކްރާމްގެ ފަރާތުން ވަނީ ނޫސް ބަޔާނެއް ނެރެފަ އެވެ.

އިކްރާމްގެ ފަރާތުން ނެރުނު ނޫސްބަޔާނެއްގައި ބުނެފައި ވަނީ ނަން އަނބުރާ ގެންދަން ނިންމީ ދެފުށް ފެންނަ އަދުލު އިންސާފުގެ އުސޫލުތަކާއި ހިލާފަށް، ހުދުމުހްތާރު ނިޒާމަކަށް މަގުފަހިވާގޮތަށް ހަމަ ބުއްދީގެ މަގުން އެއްކިބާވެ، ކޮންމެ ގޮތެއް ހަދައިގެންވެސް އިންތިހާބުން ބޭނުންވާ ނަތީޖާއެއް ނެރެން ރާވާފައިވާތީ ކަމަށެވެ.

ނަން އަނބުރާ ގެންދަން އިކްރާމް ނިންމި މައިގަނޑު ސަބަބަކީ ވޯޓުފޮށި ބަހައްޓައިގެން، ޕާޓީގެ އާންމު މެންބަރުން ތާއީދުކުރާ ކެންޑިޑޭޓަކަށް ވޯޓުލުމުގެ ހައްގު ޕާޓީ މެންބަރުންނަށް ނުދިމުންނެވެ.

އަދާލަތު ޕާޓީން ނިންމާފައިވަނީ އިންތިހާބު އޮންލައިންކޮށް ބޭއްވުމަށެވެ. މިކަމާ އިކްރާމް ވަނީ ދެކޮޅު ހައްދަވާފައެވެ.

އިކްރާމް ވަނީ އޭނާ އަދާލަތުގެ ރައީސަކަށް ހޮވުމަށް ތާއީދުކުރި ހުރިހާ އެންމެންނަށާއި މަސައްކަތް ކޮށްދިން ހުރިހާ އެންމެންނަށް ޝުކުރު އަދާކުރައްވާފަ އެވެ.