ގަވާއިދާ ޚިލާފަށް މަސައްކަތްކުރާ ބިދޭސީން ހޯދުމަށް މޯލްޑިވްސް އިމިގްރޭޝަނުން ކުރިއަށްގެންދާ ޚާއްސަ އޮޕަރޭޝަންގެ ތެރެއިން، ހުޅުމާލޭގައި ހިންގާ 5 ސެލޫނެއް އިއްޔެ ބަލައި ފާސްކޮށްފިއެވެ. އިމިގްރޭޝަނުން ހާމަކުރިގޮތުގައި، މި އޮޕަރޭޝަނަކީ ސްޕާ އަދި ސެލޫން ފަދަ ތަންތަނުގައި ގަވާއިދާ ޚިލާފަށް މަސައްކަތްކުރާ ބިދޭސީންނަށް އަމާޒުކޮށް ޓާސްކްފޯސްއިން ކުރިއަށް ގެންދިޔަ ހަރަކާތެކެވެ.

ރާއްޖޭގެ އެކި ކަންކޮޅުތަކުގައި މިފަދަ އޮޕަރޭޝަންތައް ސިލްސިލާކޮށް ކުރިއަށްދާއިރު، މިހާތަނަށް ގިނަ އަދަދެއްގެ ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ. އަދި ޑިޕޯޓޭޝަން ސެންޓަރުގައި ތިބި ފަރާތްތައް އަނބުރާ ގައުމަށް ފޮނުވާލުމުގެ މަސައްކަތާއި، މާލެ ސަރަހައްދުގެ އާންމު ތަންތަން މޮނިޓަރކޮށް އޮބްޒާވް ކުރުމުގެ މަސައްކަތްވެސް ހުއްޓުމެއްނެތި ކުރިއަށްދާކަމަށް އެ އިދާރާއިން މައުލޫމާތު ދެއެވެ.