ކ. މާފުށީ ބަނދަރު ތަރައްގީ ކުރުމުގެ މަޝްރޫއުގެ ދަށުން، ބޭރު ތޮށީގައި ބޮޑު ހިލަ ޖެހުމާއި، ވެލި އެޅުމުގެ މަސައްކަތް ކުރަމުން އަންނަ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފިއެވެ.
އެމްޓީސީސީން ބުނެފައިވަނީ، މި މަޝްރޫއުގެ ދެބައިކުޅަ އެއްބަޔަށްވުރެ ބޮޑު ބައެއް ނިމިފައިވާ ކަމަށެވެ.
މި މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ:
- 63،711 ކިއުބިކް މީޓަރުގެ ސަރަހައްދެއް ފުން ކުރުން
- 28،836 ކިއުބިކް މީޓަރުގެ ސަރަޙައްދެއް އަލުން ފުން ކުރުން
- 4،414 ކިއުބިކް މީޓަރުގެ ސަރަހައްދެއްގައި ނެރު ފުން ކުރުން
- 31 މީޓަރުގެ ސަރަހައްދެއްގައި ބޭރުތޮށި ލުން
- 680 މީޓަރުގެ ސަރަޙައްދެއްގައި ބޮޑުހިލަ ޖެހުން
- 700 މީޓަރުގެ ސަރަޙައްދެއްގައި ޖިއޯބޭގް ރިވެޓްމެންޓް ޖެހުން
- 374 މީޓަރުގެ ސަރަޙައްދެއްގައި އެއްގަމުތޮށިލުން
- 160 މީޓަރު ދިގު 2 މީޓަރު ފުޅާ ކޮންކްރީޓް ޖެޓީއެއް ހެދުން
- 19 މީޓަރު ދިގު 3 މީޓަރު ފުޅާ ބްރިޖެއް ހެދުން
- 1,869 އަކަ މީޓަރުގެ ސަރަޙައްދެއްގައި ހާބަރ ޕޭވްމަންޓް ހެދުން
މީގެ އިތުރުން ހާބަރ ޕޭވްމަންޓް ހެދުމާއި، ބަނދަރު ބައްތި ހަރުކުރުން ހިމެނެ އެވެ.
މާފުށީ ބަނދަރު ބޮޑުކުރުމުގެ މަޝްރޫއުގެ މަސައްކަތް ފަށާފައިވަނީ މެއި 22، 2023ގަ އެވެ. މި މަޝްރޫއު އެމްޓީސީސީއާ ހަވާލުކޮށްފައިވަނީ 76.84 މިލިއަަން ރުފިޔާއަށެވެ.
މާފުއްޓަކީ ރާއްޖޭގައި އެންމެ ފުޅާ ދާއިރާއެއްގައި ލޯކަލް ޓޫރިޒަމްގެ ވިޔަފާރި ކުރާ އެއް ރަށެވެ. ކޮންމެދުވަހަކު އެތައް ބަޔަކު އައިސްގޮސްވާ މާފުށްޓަށް ދިމާވެފައިވާ އެންމެ ބޮޑު އެއް ގޮންޖެހުމަކީ ލަފާ ފުރުމުގެ ދަތިކަމެވެ. އެހެންކަމުން މި ބަނދަރު ނިމުމާއެކު، އެ ރަަށަށް ޒިޔާރަތްކުރާ ފަތުރުވެރިންނާއި އަދި އެރަށަށް އަރާފައިބާ އެންމެހާ ފަރާތްތަކަށް ލުއި ފަސޭހަތަކެއް ލިބިގެންދާނެ އެވެ.
ކިޔުންތެރިންގެ ހިޔާލު