ހުޅުމާލެ ފަޅުގައި އޮތް ސަފާރީއެއްގައި ގަވައިދާ ހިލާފަށް ބަނގުރަލުގެ ވަގު ވިޔަފާރި ކުރަމުންދިޔަ ފަސް މީހަކު ފުލުހުން ހައްޔަރުކޮށްފިއެވެ. ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން މިދިޔަ ޑިސެމްބަރު 31 ވަނަ ދުވަހު ހިންގި އޮޕަރޭޝަންގައި އެ ސަފާރީއިން 102 ފުޅި ބަނގުރާއާއި 218 ދަޅު ބަނގުރާ ފުލުހުން ހޯދައިފިއެވެ.

މި މައްސަލައިގައި ހައްޔަރުކޮށްފައިވަނީ އިންޑިއާގެ 34 އަހަރުގެ އެމްޑީ ޝޭކަރު ހޮސައިން، ބަންގްލަދޭޝްގެ 35 އަހަރުގެ ރަސެލް މިއާ، ސްރީލަންކާގެ 27 އަހަރުގެ ޕުބުދު އަސެލާއި 35 އަހަރުގެ ތަރަކަ ސަމަން ކުމާރަ ދޭވައާއި މާލެ ބިންމަތީގޭގެ 52 އަހަރުގެ މުހައްމަދު މަނިކުއެވެ. މި މީހުން ކޯޓަށް ހާޒިރުކުރުމުން ތިން ދުވަހުން ފެށިގެން ހަތް ދުވަހުގެ ތެރޭގައި ބަންދުކުރަން އަމުރުކޮށްފައިވާއިރު މި މައްސަލަ ފުލުހުން ތަހުގީގު ކުރަމުންދެއެވެ.