މާލޭގެ ބާޒާރުމަތީ ގައި މީހަކަށް އަނިޔާކޮށް މޫދަށް އެއްލާލި މައްސަލާގައި ދެ މީހަކު ހައްޔަރުކޮށްފިއެވެ.
ހައްޔަރުކުރީ އެ މީހާއަށް އަނިޔާކުރި ދެ މީހުންނެވެ. އާންމުވެފައިވާ ވީޑިއޯ އިން ފެންނަގޮތުގައި އެ ދެ މީހުންގެ ތެރެއިން އެކަކު ވަނީ އެ މީހާ ގަދަކަމުން މަގުމަތީ ދަމާ ކޫއްތާފައި ގެންގޮސް މޫދަށް އެއްލާލާފައެވެ. އަނެއް މީހާ ވަނީ ސޭފްޓީ ސޫޒަކުން އެ މީހާގެ ގައިމައްޗަށް އަރާފައެވެ.
އެ މީހާއަށް މި މީހުން އަނިޔާކުރީ 15 ރުފިޔާގެ ވައްކަމެއް ކުރިކަމަށް ބުނެއެވެ.
ފުލުހުން ބުނީ މި މައްސަލައާ ގުޅިގެން ކޯޓު އަމުރެއްގެ ދަށުން ދެ މީހަކު ވަނީ ހައްޔަރު ކޮށްފައި ކަމަށެވެ. ހައްޔަރު ކޮށްފައިވަނީ ބ. ހިތާދޫ / އަންދަލީބުގެ، އަޙްމަދު ޝަރީފް (50އ) އާއި ލ. އިސްދޫ / ބްލޫކިޔާގެ، އަޙްމަދު ޚާތިމް (49އ) އެވެ. މި ދެ މީހުން ވެސް ހައްޔަރު ކޮށްފައި ވަނީ ކޯޓު އަމުރެއްގެ ދަށުން އިއްޔެ ވަގުތެއްގައި ކަމަށް ފުލުހުން ބުންޏެވެ.
މި ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ވަނީ 15 ދުވަހުގެ މުއްދަތެއް ދީފައެވެ. މި މައްސަލަ ފުލުހުން ދަނީ ތަހުގީގު ކުރަމުން ކަމަށް ވެސް ބުންޏެވެ.
ކިޔުންތެރިންގެ ހިޔާލު